O afiafi uma lava a o lei oo atu ai i le vaiaso fou – le Vaiaso o le Teuila – ua amata ai ona tumutumu le gataifale o Apia amata mai lava i Vaisigano seia oo i Mulinuu. O le mamalu o le atunuu ua agai atu e maimoaina toleniga ma sauniuniga o sa o le a faapea ona tausinio i le Tuuga Fautasi o lenei Teuila.
O loo filofilo ai i nei sauniuniga le fautasi e tasi lea o le a faafoeina e tamaitai. E to‘a 48 tamaitai ia na sailia mo lenei faamoemoe ma o le sa ua faaigoaina o le Imakulata. O se fautasi na fausia e le Matagaluega a Taufusi o le Ekalesia Katoliko. Sa tapa se fesoasoani a nisi o tamaitai o le Matagaluega a Apia ina ia faaatoa ai le auvaa.
O le kapeteni o le Imakulata o Moefaauo Tanya Toomalatai ma na ia ta‘ua o tamā lava o le Matagaluega na fautuaina le agai o tamaitai o le aulotu e faatino le aloina o le fautasi ma o le lagolago mai i tamā na faaalia e Moefaauo e maeu foi le manaia ma le maualuga ma o lea ua atoa le lima o vaiaso talu ona api tamaitai o le auvaa ina ia mautinoa e lava le sauniuniga mo le sailiga o se avanoa e tausinio ai i le tuuga fautasi.
O se matati‘a lenei ua faatūina e nei tamaitai ona e ui o lea ua iai le kapeteni tamaitai i le fautasi o le Digicel Segavao II ae e lei iai lava se auvaa na o tamaitai ua faafoea se fautasi. “Sa iai le manaoga ina ia tauva i se tuuga kulula tamaitai o le Imakulata peitai o lea ua faamautu mai e na o le tuuga fautasi e fai i le Teuila lenei ae e leai se tuuga kulula, o le mafuaaga lena ua faamalosi ai lava le manatu e agai sa‘o loa i tuuga fautasi,” o se saunoaga lea a le kapeteni.
E lē faigofie lenei taumafaiga auā ua faamauina nei i talafaasolopito o le a tausinio faatasi le auvaa lenei a tamaitai ma isi auvaa o fautasi ua tele tausaga o tausinio i lenei faagatama i le tai e pei o le siamupini o le Teuila o le tausaga na tea nei le sa o le Tolotolo o le Tamauli mai i Salelologa.
Faaalia e Moefaauo, o loo manino lava tamaitai o le auvaa, o le malosi e lē faatusalia lava le malosi o alii pe a faatusatusa i tamaitai ma o le taumafaiga i le ono lenei o vaiaso ina ia lava le mānava, ia tulimatai lelei le taimi na manumalo ai sa i le tausaga na tea nei ma le faamasani ai i le alavaa o le tuuga.
O le toatele o tamaitai o le auvaa e mai i le 18 tausaga le matutua agai i luga ma o le toatele foi ua fai o latou aiga ma e lē o faigofie le api faatasi ai o lenei auvaa i le Maota o le Matagaluega i Taufusi mo lenei faamoemoe, ae ua tuu aiga ma fanau ae sagai ane e ave le taimi mo lenei faamoemoe.
E faatolu i le aso toleniga ma o se taumafaiga e lē o faigofie peitai ua ave i ai le malosi o tamaitai ma le faamoemoe e manuia i sailiga o fautasi o le a ofi atu i le tausinioga lenei o Tuuga Fautasi o le Teuila o lenei tausaga.
Faaalia e Moefaauo, e lē na o le sailiga o le tulaga i le tuuga fautasi, o lea ua vaaia le mausali o le va galulue faatasi ai o le auvaa aemaise o tamaitai lava nei o loo nafa ma le faatinoga o le tele o atina‘e i totonu o matagaluega aemaise ia Taufusi lea ua faamalosia ai lava le galulue faatasi o le itupa o tamaitai.
O le soifua maloloina foi ma lona faamalosia i nei sauniuniga a le auvaa a le Imakulata, ua ave i ai le faamamafa – ua toatele ua lē o toe ulaula, ua toatele ua tuuitiitia le tagofia o le tapaa ma le toatele o lea ua ta‘ua le tele o le suiga ina ua faamalosia toleniga i le soifua maloloina.
“E telē lava le aogā o lenei taumafaiga e lē gata ina ia fai ai se sao o tamaitai o lenei Matagaluega i le faamanatuina o le vaiaso o le Teuila, ae o lea foi ua faamausali ai ma le mafutaga a tina o lenei aulotu aemaise i le agai i luma”. E lei faamautu mai ni fautasi o le a tausinio uma i lenei tausinioga tele o Tuuga Fautasi o le Teuila o le 2012.
