Faatu asosi loia tauaveina finauga moliaga a leoleo

O le taulamua o le ofisa o le Loia Sili a le Malo o Samoa e faatu se asosi mo loia o loo finauina moliaga a leoleo lea e taua o prosecutor, ua taunuu i se tulaga manuia ina ua faatu nei le uluai asosi a loia i le Pasefika e tulai mo le itu a leoleo. O se faalapotopotoga na faaalia e le Loia Sili a le Malo, le afioga Aumua Ming Leung Wai, o le a mafai ona fetufai ai loia i auala e faatino ai le latou galuega, aemaise o tomai ma meatotia e tauave ai o latou tiute faaloia ina ia faatumau le mamalu ma le amanaia e soo se tagata.
O le fono talu ai nei a loia mo le itu a leoleo mai atunuu o le Pasefika na aloaia ai le faavaeina o lenei asosi, ma o se mitamitaga lea o le Loia Sili a le Malo o Samoa ona ua mafai ona tafa le finagalo o usugafono eseese sa auai i le fonotaga ua tatau ona faatu le asosi. O le ofisa o le Loia Sili a lo tatou Malo na lagolago i tapenaga o lea fonotaga sa usuia i Brisbane i Ausetalia, lea sa auai le Loia Sili ma nisi o loia e toaono a le Malo.