Ua amata lenei tausaga fou i ni suiga o polokalame a le Pulega o Tagata Tafafao i Samoa poo le Matagaluega o tagata tafafao, le Samoa Tourism Authority.
Ua tatala nei mo le taimi muamua le nofoaga o loo i tua ane o le maota Samoa na umusa i le tausaga ua mavae, ua faaalia ai nisi o tu ma aganuu a le atunuu e pei o le tāina o faatagata, le vaneina o laau ma le tāina o tanoa ma isi galuega taulima.
O se tasi o tamafanau a le atunuu mai Amerika ua amata ia te ia le tāina o le tatau lea o loo feagai ma le susuga Suluape Su‘a, o le tufuga ta tatau poo le tufuga o le malofie a Samoa.
Faaalia e se sui o le pulega o tagata tafafao, o se suiga ua faia ina ia fetaui ma le taimi o tafaoga i Samoa a le toatele o aiga mai fafo aemaise foi o turisi.
“O se mea lea e faaaogā i ai lo latou taimi e tafafao i ai ma silasila ma maimoa i ia vaega tāua o tu ma aganuu a Samoa”, o le faamatalaga lea a le sui o le pulega.
E toatele tagata o le atunuu e aumau ma alaala i fafo ae oo loa i faaiuga o tausaga taitasi ona malaga tafafao mai lea i nuu ma aiga. Ua manatu ai le pulega e amata loa ona faaaogā le nofoaga mo faaaliga o tu ma aganuu a le pulega ina ia mafai ona maua ai e tagata tafafao mai fafo avanoa e silasila ai i nisi o vaega tāua o tu ma aganuu a o iai i Samoa i tafaoga ma asiasiga i aiga.
Ua tatala mai le Aso Lulu e oo i le Aso Faraile le nofoaga, ma ua talafeagai foi ma le taunuu mai o nisi o meli la‘upasese i le amataga o le masina fou.
O le meli mai Siamani e taunuu i le aso 8 o Fepuari 2011, sosoo ai ma le isi meli tele i le aso 9 o Fepuari lava mai Peretania ma lana pasese 3 afe, e aofia ai le auvaa ma tagata faigaluega i luga o le meli la‘upasese.
O nisi ia o tupe maua i le amataga o lenei tausaga ua faato‘ā faagasolo ona galuega.
Ua nofo sauniuni ai foi ave taxi e faatatafao nai turisi, peitai o le lapataiga masani lava mo i latou, o le tausisia o totogi o pasese ua faatulaga e le pulega o felauaiga i luga o le laueleele.
E mafua ona iai pea lapataiga mo ave taxi, ona e iai lava isi e fiafia e soona tasii totogi ae matagā ai le atina‘e o tagata tafafao a le atunuu o loo ave i ai le faamuamua ona o le ivitu malosi lea o le tamaoaiga e faitau fia selau miliona tupe o loo maua ai i le tausaga.
