“A o outou ua tou lapopoa tele ua tele a tou tupe,” o se vaega lea o se tusi na faapea ona tuuina atu e le alii Palemia, le Susuga Tuilaepa Lupesoliai Sailele Malielegaoi i le Taitaifono ma le Komiti Faatonu o le SUNGO, le faamalu o Faalapotopotoga Tumaoti i le atunuu, ina ua faatonuina e saili se isi nofoaga e faamautu ai se‘i faaaogā nofoaga o le Malo o loo iai i le taimi nei.
O se tusi ua ta‘ua e le Tamaitai Taitaifono o le SUNGO, le afioga Vaasilifiti Moelagi Jackson, ua manino lava o se faatonuga e lē o toe foi ai le Alii Palemia.
O le tusi na auina atu e le Alii Palemia ua fautuaina ai le SUNGO, talu ai o lea ua iai a latou tupe ma ua mautu foi le gasologa o ana galuegafai, ua tatau nei loa ona o ese auā o loo iai isi faalapotopotoga “fia ola” o loo talosagaina le Malo mo se fanua e faamautu ai.
O le fanua lea o le Malo i Motootua sa faaaogā e le Matagaluega o le Soifua Maloloina i tausaga ua mavae, na faamatuu atu e le Malo auā le Ofisa Tutotonu o le SUNGO. O se fesoasoani i le tau faamautu ai o le Faamalu o Faalapotopotoga Tuma‘oti.
O le faamatalaga a Vaasiliifiti e masalomia lava o le lē mālie o le alii Palemia i lafoga a le Ofisa Sili o le SUNGO, le Susuga Roina Faatauvaa Vavatau i le Campbell Live e faatatau i suesuega ia ua faia e le TV3 ma lea alii i le faasoaga o le tupe o le sunami, lea ua faia ai lenei faaiuga.
Na tāpā se finagalo o le alii Palemia pe moni ia masalosaloga ae o lana faamatalaga e lē o fia talanoa lava e faatatau ia Campbell seiloga lava ua feiloai ma le alii lea ona toe laga lea o sona lagona i lea mataupu.
E lei tali mai foi ina ua tāpā pe lē o le mafuaaga lava lea ua faatonu ai le o ese o le SUNGO.
Ona pau lana tali na aumai ua fai mai ai o ia e alofa lava i le SUNGO ma ua tele foi galuega lelei ua o latou faia, ae o lea na ta‘uta‘u lava le agai i se fale fou ma se fanua fou.
O lea la ua manaomia le nofoaga lea mo se isi faalapotopotoga, ua fia see atu i le amataga o Tesema. O le mafuaaga lea o lona fautuaina o le SUNGO ina ia see ese.
Faaalia e Vaasiliifiti Moelagi, ua toe ave le tali o le tusi ma ua faamanatu ai le tiute foi o le SUNGO latou, e taulagalaga i mataupu e manatu e tatau ona faaali ai se finagalo ma o le tiute o le “Watchdog” o le taulogologo ma faamanatu pe a iai ni mataupu e manatu o loo faaletonu ai foi le Malo latou.
O le tali a le Palemia e tumau le alofa i le SUNGO ae e lē toe foi lava i le faaiuga ua iai nei, ina ia see ese ma le nofoaga o iai nei i Motootua.