Ina ua alu faasalalauga faatosina a kamupani telefoni feaveai o le Bluesky ma le Digicel Samoa ma faailoa ai le ausia e a la tautua o le saosaoa o fesootaiga tau initaneti o le 4G poo le “fourth generation”, e faaaogā ai telefoni feaveai, e lei toe mapu le toatele e fiafia e faaaogā ia fesootaiga televavave faaonaponei i le faatau o telefoni ma lesitala loa i lea fesootaiga fou ua oo mai i Samoa.
Peitai na alu alu ia faatosina ma faasalalauga faalauiloa, ae mapuna a‘e ni lagona faaalia mai nisi e malamalama i fesootaiga nei, ma faailoa ai e lē sa‘o faasalalauga a kamupani e lua, ona e na o le 3G poo le “third generation” o loo maua i Samoa.
Sa faaalia e pulega o le Digicel ma le Bluesky i ni lipoti na mafua ona o ia lagona faaalia, o loo sagatonu ma sa‘o a la faasalalauga ma faalauiloa.
Na mafua ai loa ona liliu le Pule Faatonu poo le tagata e vaaia fesootaiga televavave uma i le atunuu le Regulator, ma faia se suesuega ina ua faaseā nisi faasaga i ia kamupoani telefoni. O le faaiuga o ia suesuega ua fai mai ai le Pule Faatonu e lē sa‘o le Digicel ma le Bluesky. O lona uiga e lei ausia e le Digicel ma le Bluesky le 4G. Ua faatonuina ai i se faaiuga a le Pule Faatonu ia kamupani e lua ina ia aveesea ma taofia loa a la faasalalauga faalauiloa. O le Bluesky Samoa na muamua lava faalauiloa lona ausia o le 4G, ae o masina na mulimuli ane ai faatoa faia faalauiloa a le Digicel lea sa faalauiloa ai ana faatosina i luma o le maketi i Savalalo sa faailoa ai ata ma lanu mumu soloatoa ai lumafale o le Fili maketi.
E faapena foi le Bluesky i mitiafu ma fu‘a sa faalauiloa ai lona ausia o le 4G, ma e toatele nisi o le atunuu o loo laeiina mitiafu 4G a lea kamupani telefoni e oo mai lava i le taimi nei. Sa taumafai e saili pulega o nei kamupani e lua mo ni manatu faaalia i le faaiuga ua aumai e le pule faatonu.
O loo malaga i fafo le pule o le Digicel, ae o le pule o le Bluesky ua ia faaali sona finagalo i se tasi o nusipepa, ma ia ta‘ua ai le lē talia e le kamupani o le faaiuga ua aumai e le Pule Faatonu. O le faamatalaga a le alii pule le afioga Aoe‘e Montenegro, e sese le Pule Faatonu ona na mafua ona faalauiloa e le Bluesky lona ausia o fesootaiga tau 4G ona ua ia maua.
Peitai o le faamatalaga a le alii pule o le a talia pea ma faaaloalo le Bluesky i le iuga ua aumai. E aumai le faaiuga lenei i le vaiaso ua mavae, ua tuanai nai vaiaso e lei toe vaaia ai ni faasalalauga faatosina ma faasalalauga faalauiloa a ia kamupani e lua i luga o auala o faasalalauga i nusipepa, leitio ma televise.
