E lua masina ua ave e le faamasinoga i se aiga i Leufisa e tapena ese ai a latou meatotino uma e aofia ai ma fale, ae toe faafoi le pule o le eleele umia saoloto i le ofisa o Tausi Mavaega o loo iai le vaaiga faaletulafono o le fanua e silia ma le tolu eka lona telē sa lesitala ma faamauina faaletulafono i le suafa o George Collins.
O le mataupu lenei na tuuina atu i le faamasinoga e le ofisa Tausi Mavaega faasaga ia Julia Fidow, o se alo e faasino ia Mary Collins na māvae i ai le fanua numela 721, lea na fausia ai e lona tuaa (tamā) se fale i luga o le fanua.
O isi sa faasaga i ai le tagi o Tea ma Noel Sanft e faapea o le afafine ma le toalua (daughter and son in law) o Julia Fidow. E toalima le fanau a George Collins ma sa vaevae tutusa i ai le fanua i lana fanau e aofia ai ma ia. O ona alo e aofia ai Robert Collins, Gus Collins, Mary Collins, Grace Collins, ma Louise Collins.
O Julia Collins o loo faasaga i ai le tagi ma nisi o lona auaiga o le alo tamaitai lea o Mary Collins, ma o le finauga a i latou na faasaga i ai le talosaga a le ofisa o Tausi Mavaega, ua avea i latou ma tagata e umia le fanua e fua i tausaga sa nonofo ma faamautu ai i le eleele, lea na fausia ai le fale o lo latou tina.
O le tausaga e 1983 na vaevae ai le fanua i le fanau e toalima ma e lei finauina e i latou na faasaga i ai le mataupu lea tulaga. I le molimau a se tasi na faasaga i ai le tagi o ia lea o Julia Fidow, na ia ta‘ua ai o lona malamalamaga i le vaevaega o le fanua, e lei ma‘oti i latou e faasino i ai ma e lē tatau ai ona faaauauina le mataupu.
Peitai o faamaumauga sa tuuina atu i le faamasinoga o loo manino ai o le ofisa o Tausi Mavaega sa faamauina ma lesitalaina i le masina o Oketopa o le tausaga e 2007, o ia lea e na te vaaia le esetete poo le eleele a lē ua maliu. Atonu o le mafuaaga lea o le lē silafia e Julia poo ai na faasino i ai se tasi o fasi fanua o loo faanumeraina o le 718 poo le parcel 718 i le tausaga e 1983 na faia ai le vaevaega.
I le suesueina o molimau a le ofisa o Tausi Mavaega na lagolagoina ai e nisi o le aiga le mau a le ofisa. E toalua le fanau a Robert Collins o le uso o lē ua maliu o i laua ia o Sina ma Elizabeth. O lo la tama o Robert na maliu i le tausaga e 1987, ae sa ia fausia se fale i luga o se tasi o fasi fanua numela 718 lea na fausia ai ma se faleoloa talu mai le tausaga e 1968. Sa ia fausia ai foi ma se faleoo i tua ane o le faleoloa.
O Alefosio Filipo sa nonofo ma Robert sa ia fausia foi se fale i luga lava o lea fasi fanua numela 719. Na tuua e Alefosio le atunuu mo Niu Sila i le tausaga e 1979, sosoo ai ma le malaga atu i ai o lona tina ma lona uso i le tausaga e 1981 ma le 1983. O le toalua o Robert na maliu i le tausaga e 1983 ma tuua ai na o Robert ma lana fanau ua faaipoipo ma nonofo i nisi o nofoaga eseese.
Ua 72 tausaga o le soifua o Sina o se tasi o alo tamaitai o Robert Collins, sa molimau ma ia faailoa i le faamasinoga e faapea sa masani ona asiasi i lona tamā i Leufisa a o faiaoga ma sa masani ona ia siakiina ai fale o lona tamā o loo i luga o le fanua numela 718. O lona tuagane o Lucky na toe foi mai i le atunuu i le tausaga e 1985 ma nonofo ma lona tamā i luga o le fanua numela 719.
O le tausaga e 1987 na maliu ai Robert i le nofoaga mo tagata matutua i Mapuifagalele, ma o sauniga ma tapenaga uma o lona maliu na faaalia e le tina o Sina sa faia uma i luga o le fanua numela 718, lea sa tuufua e lei nonofo ai nisi se‘i vaganā le fale o Alefosio Filipo ma lona tamā sa tutū ai.
O Robert na tanu lona tino maliu i luga o le fanua numela 722 le fasi fanua sa tuuina atu i se tasi o le fanau o Grace, lea e faapea o loo iai le fanua tanu o le aiga. Sa faaalia i le molimau a Elizabeth Betham le uso o Sina e faapea, sa masani foi ona asiasi i lona tamā a o soifua, ina ua tuanai le maliu o lona tina i le tausaga e 1983.
Talu mai le tausaga e 1987 na maliu ai lona tamā e lei nofoia e se tagata le fanua numela 718 lea sa faia uma ai sauniuniga ma tapenaga o le maliu o lona tamā o Robert. O le taimi lea o loo nofo le tasi o loo faasaga i ai le tagi, o Julia Fidow i luga o le fanua numela 721. Na faamaonia i molimau a Sina ma Elizabeth o le isi afafine o lo latou tamā o Christina sa nofo i luga o le fanua numela 718 seia oo ina malaga ese ma Samoa ma faamautu i Niu Sila.
O le molimau a Julia Fidow na ia ta‘ua ai, o Ianuari o le tausaga e 1984 na latou totō ai laau ma fau se fale Samoa ato ‘apa i le faatonuga a lo latou tamā i luga o le fanua numela 718, ae o Novema o le tausaga lava lea na foi mai ai mai Ausetalia i Samoa le isi atalii o Robert ma fau se fale i luga o le fanua numela 718 i le faatagaga ma le ioega a lona tamā.
O lea fale na fausia e sosoo ma le fale o Julia o loo faasaga foi i ai le tagi a le ofisa o Tausi Mavaega. Na foi mai i Samoa Lucky mo le maliu o lona tamā ma talosagaina ai le tamā o Julia Fidow ina ia teu lona tamā i luga o le fanua numela 718, a o lei maliu ma ave tausi i le nofoaga o tagata matutua.
O le tali na avane e tanu i luga o le fanua numela 721, talu mai la le tausaga e 1987 sa faapea ona nofoia lava e i latou ua faasaga i ai le tagi le fanua numela 718. O le silasila a le faamasinoga i le finauga e talitonuina ai molimau a Sina ma Elizabeth sa nofoia le fanua numela 719 ae o le molimau a Julia Fidow ua manatu le faamasinoga e lē faaaogāina ona e tele vaega e lē sa‘o ai pe a fua i molimau a nisi o le aiga e lagolago ai le mau na tauave i le tagi a le ofisa o Tausi Mavaega.
O le faaiuga ua faia e lua masina ua ave i le itu na faasaga i ai le mataupu e tapena uma ese ai a latou meatotino ma ia latou totogi foi le tupe e $3,000 mo le faamasinoga atoa.
