“Tele le fesasia‘i solo o le public relation officer talu ai ona o le fia oso i luma o le TV ma le leitio,”…Tuilaepa
E lē o manao se tasi o tamalii sa galue o se leoleo o le Malo e faailoa lona suafa, ae ua malie e faasalalau sona lagona mimilo i le tusi fautua a le Palemia susuga Tuilaepa L Sailele Malielegaoi, ua manino ai o se faatonuga ua ave i le Komesina i le tuuina atu o faamatalaga e faasalalau e tusitala.
“E matautia tele i so‘u lagona le tualaga ua ou faitau atu nei i ai, ona ua aliali ai le aiā fua o le Palemia i le faiga o le galuega a leoleo, ae faapefea la ona malamalama le atunuu i mea o tutupu pe afai o le a tusi pepa faamatalaga o mea ma ave e faasalalau ae leai se avanoa e fesiligia ai leoleo i le taimi lava lea mo se tali poo se faamalamalama atili?”
O lea tamalii sa galue i le matagaluega mo le tele o tausaga ae ua malolo litaea, ma o lana mau o aso ma tausaga ua mavae a o faigaluega, sa sosolo lelei le faatinoga o lea pitolaau a leoleo sa tofia i na aso, e fai ma sooupu mo le faailoaina i tusitala o nusipepa ma leitio faapea televise o faamatalaga o ni faalavelave ma ni solitulafono matuiā e tutupu.
E oo lava foi ina fesiligia e tusitala ni amioga poo ni faaiuga fai a le matagaluega e aafia ai ni tagata sa sologa lelei lava.
Peitai o lana mātau i le tusi a le Palemia ua ave i le komesina o leoleo ma fautuaina ai le faiga o le galuega a le latou sooupu, e iloa ai poo n i mea ua soona masua i fafo sa tatau ona natia e lē faailoaina.
O le fautuaga a le alii Palemia e ala i se tusi i le faauluuluga o le matagaluega e faapenei: “Ou te fautua atu, tapena press releases a leoleo i soo se mataupu e laga, ae ‘alo‘alo ese ma interviews. O written press release e control atu ai e outou faamatalaga i mea tau leoleo e ta i nusipepa, ae a matele i le talanoa, e pule ai le Observer e milomilo solo faamatalaga. Aua le fiafia e appear soo i le TV, tele le mau mātau e lama ai outou e le autusitala – e iu ane ua aliali ai ma le faaletonu ma le lē lava tapena o le leoleo ona matagā ai loa lea o leoleo. Tele le fesasia‘i solo o le public relation officer talu ai ona o le fia oso i luma o le TV ma le leitio. O tusitala latou te masani ona avatu fesili faafuasei e lei tapena i ai le matagaluega.
O loo sainia le tusi e le susuga Tuilapea Fatialofa Lupesoliai Malielegaoi o le Palemia”. O feiloaiga masani i vaiaso a tusitala ma le sooupu o le matagaluega o leoleo ma falepuipui o loo faatautaia e se tasi o leoleo sinia o se tasi o komesina lagolago le susuga Fauono Talalelei Tapu. O le tasi o komesina lagolago sa avea ma sooupu le afioga Leaupepe Fatu Pula, e lei filifilia ina ua mae‘a le tolu tausaga o lana konekarate.
