O le tofa Manogiamanu Fonoti Ioane sa avea ma Pule sili o le pulega o taaloga a le Pasefika i Saute o se itutino o le Malo na faatuina mo le tapenaina o taaloga a le Pasefika i Saute sa talimalo ai Samoa i le tausaga e 2007. O le pulega foi lea sa avea ai ma taitaifono o le Komiti faafoe o lea pulega le afioga Faumuina Tiatia Liuga.
O tauofoga mo le faatinoina o galuega mo lea taligamalo e aofia ai le fausia o faletaalo sa tuuina atu ai ma le ofo a le konekarate o le Afolau Construction Company Limited sa avea ai le tofa Toluono Feti Toluono ma Pule Faatonu. O se konekarate a lea tamalii faatasi ai ma lona uso.
O le tausaga e 2006 na tuuina atu le ofo a lea konekarate mo le fausia o se tasi o faletaalo. O le ofo na ave e $4 miliona, 363 afe, fituselau onosefululima tala ($4,363,765).
Peitai na faia nisi o feutanaiga i le va o le Pule sili ma le konekarate e pei ona sa faatonuina e le komiti faafoe, ma faaitiitia ai le tau o le galuega ma suia ai le ofo a le konekarate i le $2 miliona 835 afe, limaselau fāsefuluvalu tala ma le 84 sene.
O Aperila o le tausaga lava lea 2006, na toe fono ai le kapeneta ma faia se isi faaiuga ina ia toe foi le tau o le galuega i le fā miliona ma ona tupu e pei ona sa tuuina atu muamua e le konekarate a le Afolau.
O le masina o Me o le tausaga lava lea na tusi atu ai le Pule sili i le pulega o le konekarate ina ia amata loa le galuega ae ia toe fetuunai pea le tau o lana ofo, peitai na tali i ai le pulega ma faailoa i ai le tau faaopoopo e silia i le $367 afe.
O i tonu na tulai mai ai loa se feteenaiga a o faagasolo le galuega seia oo ina mae‘a, e lei totogia atu lava le tau faaopoopo atoa ai ma nisi o totogi poo fees ua toe faaalu ai tupe a le konekarate. Sa taumafai pea le pule faatonu e tusi atu i le pulega o taaloga ma faamatala i ai tulaga uma sa malilie i ai. Na oo foi le alii pule faatonu i le Palemia mo se fesoasoani ae e lei maua ai se fesoasoani.
O le mafuaaga lea na sulu ai le konekarate i le faamasinoga maualuga ma finauina ai le totogi mai o le tau faaopoopo atoa ai ma isi vaegatupe. Pe a fua i lenei mataupu ua silia nei ma le ono tausaga talu ona mae‘a le taligamalo mo taaloga a le Pasefika i Saute, ae o le tausaga nei ia Setema na aumai ai le faaiuga a le faamasinoga.
Ua faatonuina ai le pulega o taaloga, o se faalapotopotoga a le Malo ua nafa nei ma le vaaia o faletaalo ma mataupu uma tau taaloga, e totogi atu i le Afolau Construction le vaegatupe e tusa ma le $319,468.
O le $62,595.19 o le variation cost. O le isi variation cost e $9,820.44, ma le tupe toe faafoi poo se reimburstment e $5,342.50. O le aofaiga atoa e $397,226.33 ma e faaopoopo i ai ma le 12 pasene amata mai ia Setema o le tausaga e 2007 e oo mai ia Setema o le tausaga nei 2013.
O le finauga lenei na suesueina e lana afioga i le faamasino o le faamasinoga maualuga, Lesatele Rapi Vaai e pei ona aumai ai lana faaiuga lenei.
