Faatonu e le Faamasinoga ia tatala ese pagota mai le pa sima

Talu mai le masina o Me o le tausaga nei lea na faoa faamalosi ai e ni pagota se pasi i Tafaigata ma agai mai i le taulaga, na faia ai se faatonuga ina ia tatala ese pagota mai i le nofoaga ua taua o le pa sima i le toese i Tafaigata.
O se faatonuga na faia e le Faamasinoga i le maea ai o se poloaiga na fofogaina muamua e le afioga i le Faamasino o le Faamasinoga Maualuga, Lesatele Rapi Vaai, na ia faaalia ai o se nofoaga lea e le talafeagai mo soo se tagata soifua e oo lava i pagota.
O le afioga i le faamasino o le Faamasinoga Faa-Itumalo, le Afioga Tauiliili Harry Schuster na toe faia le poloaiga lea i le lua vaiaso talu ai, ina ua ia maua i le faagasologa o iloiloga faasaga i pagota ia na sosola i le pasi ia Me, o loo taofia lava nisi o nei pagota i lea nofoaga o le toese. Na tuu mai la seia aulia le vaiaso nei poo ua faatino lea tulaga.
O le tulai ai o ni pagota se toa sefulu (10) i luma o le Faamasinoga i le faaiuga o le vaiaso ona o lea lava mataupu, na talosagaina ai loa e se tasi o ia pagota o Laloifi Faisauvale faapea, ua tatala uma i tua isi pagota e pei ona faatonuina sei vagana ai o ia ma nai ona tei.
O i latou nei na faasala faafalepuipui ina ua faamaonia moliaga o le fasioti tagata faamoemoeina i le faalavelave lea na maliu ai se tama i Satapuala i le po o le vaeluaga o le 2006 seia oo i le taeao o le Tausaga Fou o le 2007.
O le mafuaaga lea na taua e Leoleo o loo tumau ai le faasalaga o nei alii ma le taofia o i latou i lea nofoaga ua taua o le pa sima.
Ina ua toe laga lenei mataupu i le lua vaiaso talu ai, na manino le faateia o le alii Faamasino, o Tauiliili Harry Schuster i le maua ai o loo taofia pea le tele o nei pagota i lenei nofoaga. Ua tele foi ni faitioga ua laga e pagota pe a tulai i nisi moliaga faaopoopo, ona o le tulaga o iai potu taofia poo le falepuipui i Tafaigata.
E ui i lea ua maea ona toe fausia nisi nofoaga fou e taofia ai pagota e pei ona faaalia i le ata, ae e foliga mai o le pa sima lava o loo faaauau ona tetee i ai pagota nei.
O le iuga o le toasefulu na tulai i le faaiuga o le vaiaso ona o le taumafaiga lea e agai mai i le taulaga ia Me, ua tuu i ai tausaga e lua e sa ai ona toe aafia i nisi soligatulafono, ma a toe tulai mai ona faaauau ai loa lea ona faasala i le moliaga e pei ona sosola ese ai i le pasi.
O le fautuaga na tuu atu e le alii Faamasino, le afioaga ia Tauiliili Harry ina ia aua nei iai ni uiga faapenei o le fia sosola lava ma o ese, o nei tagata ma le faaaogaina o agaese sei tulou e faamatau ai le avepasi ina ua agai mai i le taulaga.
Mo le mataupu e pei ona talosagaina e Faisauvale, e lei toe faia i ai se iuga a le Faamasinoga ae na laga le atugaluga o le Afioga Tauiliili i lenei lava mataupu, lea foi ua maea ona faamalosia mai i ai le poloaiga a le Faamasinoga ina ia aveese i latou o loo taofia ai i le pa sima i Tafaigata.