Ua lagona e le faamasinoga le faanoanoa i le faatupulaia pea o solitulafono tau feusuaiga fai faamalosi e aafia ai le ola mu‘amu‘a o fanau teine laiti a le atunuu.
Ua faatiga fofoga ma faatiga ulu i le toatele nei mataupu pe a lipotia i auala o faasalalauga. Peitai e lē natia ai i lalo le pitolaau o le tau logologo ina ia avea ma faatupu manatu i taitai o le Malo, ekalesia ma le atunuu faapea le lotoifale o aiga i nuu ma alalafaga o Samoa.
O le Aso Lua, aso muamua o Novema 2011 na faia ai ni faaiuga a le Faamasinoga Maualuga i ni alii ua matutua ona o moliaga o le faiaiga fai faamalosi ma le faia o uiga matagā. O se teineititi e 15 tausaga na aafia ai, faapea se teineititi faato‘ā 6 tausaga le matua.
O Faafouina Filipo ua 39 nei tausaga o lona matua ae o le 38 o ona tausaga na ia faatino ai ni faigaaiga fai faamalosi se tolu i le teineititi 15 tausaga, o se tasi o lona aiga potopoto (extended family).
O Aukuso o le tausaga na tea nei na ia faatino ai le solitulafono lea na ia faaaogā ai lona malosi e faamalosi ai lē na aafia. E lē gata ina ia faia i ai se faigaaiga faamalosi ae sa ia faia foi i ai ni uiga matagā.
O le tausaga e 1996 na tuua ai e Faafouina Samoa ae malaga i Niu Sila lea sa nofo ai mo le valu tausaga. O le tausaga e 2004 na toe foi mai ai i Samoa ma galue ai o se faifaatoaga i lo latou nuu o Lona i Fagaloa. E toalua lana fanau na maua i Niu Sila ae e lei faaipoipo.
O le teineititi na aafia ua lē toe iai sona lagona e fia faauo i isi tagata ma ua fefe pe a vaai i se tama tane, e mafua mai ona o aafiaga i lona mafaufau ona o le solitulafono na faia ia te ia.
O le ogaoga foi o ia aafiaga o le mafaufau o le teineitiiti ua oso ai lona matamuli ma le mā i tagata, ma ua oo lava ina lē toe fia foi i lo latou nuu. Na ma‘ito lē na aafia i le solitulafono ua faasalaina ai Faafouina Filipo i le 18 tausaga i le falepuipui. Sa finauina e loia a le itu a leoleo se faasalaga e 25 tausaga i le falepuipui ona o le matuia ma le ogaoga o le solitulafono. O le silasila a le faamasinoga e lei iai se salamō o lē ua molia i le solitulafono na ia faia, ona o lona tetee sa lē faasaoina ai le tamaitai na aafia mai le faaopoopo o isi aafiaga o lona mafaufau ina ua faia lana molimau tuu fofoga ma toe faamatala le mea na tupu. Na tulai foi lē ua molia ma faia lana molimau ma ia teena lava e lē o ia na faia, ae o se isi tagata.
41 tausaga e matua mamao ai, ae na ia faamalosi le alualutoto
O le 47 tausaga o Amosa Sione, e iai ona manaoga faapitoa ona e tau lē atoatoa lona mafaufau, ae na ia faamalosi le teineititi e 6 tausaga le matua. O le nofoaga poo se apitaga mo tagata e iai manaoga faapitoa a le ekalesia Katoliko i Moamoa sa mau ai lea taulealea ua matua. O le agalelei o lea polokalame a le ekalesia ma faanofo ai Amosa ona e lē fia alu i sona aiga, na tauia i lona faatino o le solitulafono i le alo teine o se tina sa faigaluega ai i le apitaga. O le teineititi na tuli e lona tina e tia‘i le lapisi ae fetaui ai ma Amosa ma tupu ai loa le solitulafono.
Faaalia e leoleo e faapea ina ua uma ona faatino le tuinanau o le alii, ona ia tia‘i ai lea o le teineititi i le nofoaga sa ia faamalosi ai ma faatino le faigaaiga.
O se faanoanoaga tele lea i le faamasinoga pe a fua i le matua tele o le alii ma le teineititi na aafia. Faaalia e le alii faamasino o Slicer, o le a umi se taimi e aafia ai pea le mafaufau o le teineititi ona o le mea na tupu.
O le mataupu lenei na tulai mai ia Aperila o le tausaga ua mavae 2010, lea sa tuua‘ia ai se tasi o fesoasoani o le Ekalesia Katoliko ma lona faletua sa faauluulu i ai se tasi o polokalame a le Ekalesia o le Fiaola Clinic. Peitai ua mae‘a sailiiliga a le ekalesia i le mataupu na tulai mai, ma ua lē faamaonia ai lipoti sa ta‘ua ai lea tulaga.
