Faatofa mai Toaletai ae alo pea le Sa o Alex Leapai

E ui lava ua faalauiloa aloaia le faamavaega a le afioga ia Toaletai David Tua ina ua mae‘a lana fusuaga, ae o ia lava o se fetu pupula i loto ma finagalo o soo se Samoa. Na  lagona e tagata uma i soo se vaega o le lalolagi le agaga fiafia i lenei foi tamalii o le atunuu, ua ta‘uta‘ua ai foi Samoa i le lalolagi e tusa ma lana toe fusuaga.

 
Ua mae‘a la le tapuaiga a le atunuu i lana taaloga, peitai ua toe alo atu foi le tapuaiga mo le taaloga a le susuga ia Alex Faatauī Leapai lea o le a faataunuuina i le aso 23 o Novema 2013 e fetaui ai ma le alii o Denis Boystov o se alii ta‘uta‘ua foi i le lalolagi lea o le a faia lea fusuaga i Siamani.

 
O Alex Leapai o se tasi o alo o Samoa ua lauiloa i le LIONHEART. Afai ae manumalo mai Alex i lana taaloga lea i le vaiaso nei e ono maua ai lona avanoa e agavaa ai i le fusi o le lalolagi ma e manaomia lau tapuaiga Samoa a o alo faiva lea foi alo o le atunuu i lana fusuaga.
O le Aso Gafua na malaga ai le alii o Alex ma si ona tuaa ia Faatauī Leapai faatasi ma lana trainer ma le manager i Siamani auā le alo atu i le taaloga. E lē sili le ta‘i i le tapuai. Ia tafe toto ou ala Alex, ia agalelei le Atua ma ia foai pea le malosi faafouina ia te oe ina ia faamalosia pea lou tino e tau ai le taua i le aso 23 o Novema.
Pe malolo pe manumalo e viia lava le Atua i soo se mea, pau lava o lea, o lou fatu e malosi e te sisiina pea le tagavai a Samoa i lau taleni ua faamanuiaina ai oe Alex.

Alex Leapai, si ona tina ia Leitu mai Samoa ma ona uso