O le faasala tupe ai o le faipule o Aana Alofi Numera 3 e le faamasinoga faatasi ai ma isi tagata e aofia ai ma ni matai ona o moliaga e fesootai ma le poloka o le alatele o le Malo i le tausaga ua mavae, na faia ai le faaiuga a le Fofoga Fetalai o le Palemene e taatia atu le faaiuga lenei i le Palemene mo so latou finagalo.
Na manino le finagalo o le Fofoga o le fono, ua lē tuuina atu le mataupu i le komiti o tulaga mamalu ma amioga taualoa a le fono aoao faitulafono ona ua lē manino aiaiga i le solia e le faipule o ni amioga laiti. O le mafuaaga lea o lona taatia atu i le Palemene.
E lei pine ona mae‘a le saunoaga a le Fofoga Fetalai ae tulai le faipule o Aana Alofi Numera 3 le afioga Toesulusulu Cedric Schuster, ma faia lana faatoesega i le maota fono. Na saunoa ai le faipule ma ia tautino o lona aafia i le mataupu e leai sona lagona e faatautee pe na te fou i le Palemia ma le Malo.
O lana faatoesega na faapa‘i ai i le mamalu o le atunuu pe afai na lagomia ma aafia ni lagona i le tulaga na tulai mai ona o se amioga ua sala i le latou matau.
O le mae‘a o le faatoesega na tuu ai le avanoa e le Fofoga Fetalai i le taitai o le Malo le afioga i le Palemia susuga Tuilaepa Lupesoliai Sailele Malielegaoi, mo sana saunoaga.
Na manino i le folasaga a le alii Palemia le lagona o le loto faamagalo i le alii faipule ma ona aafiaga i le mataupu aemaise o le faatasina ai o le tofi mamalu o le itumalo ina ua molia e leoleo le faipule ma nisi o lona nuu o Satapuala.
Saunoa ai le alii Palemia ma ia toe faamanatu ana saunoaga i lana lauga faaminisita sa faia i le Palemene i le tuanai o le mataupu lea na ia faailoa ai le lē ‘alo o le Malo ma le Palemene i le faia o le faaiuga tatau i soo se tasi o sui mamalu o le fono aoao pe a aafia i ni faiga solitulafono e atagia ai se taumafaiga e lepeti le filemu ma le nofo lelei o tagata o le atunuu. Na faailoa ai foi e le alii Palemia o le mafuaaga lea o le tuuina atu o le mataupu i le Loia sili seia oo ina faia suesuega a leoleo ma faia ai moliaga ma taunuu le mataupu i le faamasinoga.
O le saunoaga a le taitai o le Itu agai ma le vaega faaupufai o le Tautua Samoa o loo avea ai le afioga Toesulusulu Cedric ma sui lagolago na ia matuā momoli ai le faafetai i le Palemia ona o le agaga faamagalo i le faipule.
“Ua faafetai i lau afioga ua ola le pagota”, o upu ia o se vaega o lana saunoaga. Ua ave le togisala a le Fofoga Fetalai ina ia fai ni ‘ai o le mataupu, o le a saunia e le faipule o Aana Alofi Numera 3 le taumafataga mo le fono aoao pe a toe tauaofia i le aso 17 o Tesema 2013 mo lana fonotaga faaiu o le tausaga.