Faato‘ato‘a e Saina le fausiaina faleaoga o Falevao

O le galuega ua mae‘a o le faleaoga a le aoga tulagalua a Falevao, ua faatupeina ma fausia e le Malo o Saina i se fausaga fou e ese mai i le tele o isi faleaoga uma i totonu o le atunuu.
O le toatele na molimauina lea faamoemoe, na faateia foi, ona o vaaiga eseese i lea faleaoga, e lē o mafai ona maua i isi faleaoga uma i le atunuu.
O le Afioga i le Alii Palemia, Tuilaepa Lupesoliai Sailele Malielegaoi, o ia lea sa saunoa i le saunoaga autū mo le tatalaina o lenei galuega tele, ma faafetaia ai le fesoasoani a le Malo o Saina i le faatupeina ma le fausiaina o le faleaoga fou mo Falevao, o se tasi o nuu tua i le Itumalo o Atua.
Saunoa Tuilaepa, o le fausaga fou faaonaponei ua iai le aoga tulagalua a Falevao, e talitonu o le a lē gata ina siitia ai le ola aoaoina o le fanau ae faapea ai foi ona alualu i luma ma le faatinoga o galuega a faiaoga o loo galulue ai.
“Ou te talitonu foi o le a manuia taumafaiga a le fanau, ma atamamai tama ma teine o Falevao o le a galulue i le atinae o le atunuu i le lumanai,” o se saunoaga faamalosiau lea a le Afioga i le Alii Palemia.
A o lei amataina le galuega o le faleaoga lenei a Falevao, sa tele ina agai le fanau i nuu tuaoi e pei o Falefa, e aooga ai, ona e lei mautu se faleaoga i tausaga ua mavae e agai sa‘o iai tamaiti o le nuu.
O le faaauauina o le manulauti a lo tatou Malo, o le faasopolia lea o le fausia ma le faaleleia o aoga tulagalua, aoga maualuluga ma kolisi e aoao ai fanau a Samoa, lea e iai galuega o faleaoga o loo faagasolo nei.
O le galuega o faleaoga fou ma galuega toe faaleleia mo faleaoga na faaleagaina i le afā o Eveni i le tausaga na tea nei, lea ua faagasolo le toe tatalaina ma faaauau ai aoga a le fanau, se‘i vaganā ai nisi o faleaoga faatoa amata fausia i le vaitau e tuua ai aoga a le fanau i le tausaga lenei.
O le galulue faapaaga a lo tatou Malo, ma Malo o Saina, Niu Sila, Ausetalia, Iapani ma le Iuni a Europa, lea e iai le tele o fesoasoani ua faatupeina ai le tele o faleaoga ua fausia.
O le galuega o le faleaoga a Falevao, o le faleaoga muamua lea ua tatala o faleaoga e fā ua fausia i lalo o le polokalame a Saina o loo faagasolo.
Peitai, o faleaoga ia e fā, e lē o se taimi muamua lea ua fesoasoani mai ai Saina i le fausiaina o ni faleaoga, o loo iai nisi o galuega ua leva ona i totonu o le tatou atunuu, na lagolagoina ma faatupeina uma e Saina.
Mo le silafia, e lē na o vaega tau aoaoga e mafai ona fesoasoani mai ai atunuu ua ta‘ua i luga. Faaalia e le Afioga i le Alii Palemia, e avanoa ia faalapotopotoga uma, e aumai ai nisi fesoasoani eseese e aofia ai le toe fausia ma le faaleleia o taligalu, foai o tane vai, fausia o maota mo tina ma tamaitai, ma faagaioi ai soo se atinae o loo galulue faatasi ai le atunuu.
“O loo lilifa loto ma finagalo o le tele o Malo, ina ia siitia le tulaga maualuga o tamaitai, ina ia lagolago i le atinae, ona ua ese lenei taimi, ua taufai atiae tutusa alii ma tamaitai,” o se saunoaga lea a Tuilaepa.
O le tino mai o le tele o galuega ma atinae, o loo fautuaina ai e le Malo le atunuu ina ia talosagaina fesoasoani mai isi Malo, e amata faatino ai atinae mo le agai i luma.