Na fiu taumafaiga a le taitai leoleo o loo vaaia le ofisa o Leoleo i Tuasivi ma nisi sa lagona le loto fia fesoasoani e talosaga i Alii ma Faipule o le pitonuu o Sakalafai, e tatala le auala ua latou poloka i maa, e le mafai.
Na fiu foi faafeagaiga na savalia le laoa o le aiga Sa Pauli i Sakalafai e ave le tuualalo i le tofa Apelu Ioane o se tasi o matai tuua o le pitonuu e alofa ma tafa lona finagalo ae sa le mafai.
O le matau i ai pe silia ma le itula atoa o taumafai pea faifeau o ekalesia Metotisi i Salelologa e tatalo i Alii ma Faipule o le afioaga, e le mafai lava.
O le faafeagaiga Metotisi o le pitonuu o Saloga le susuga Reupena na muamua tootuli sosoo ai ma nisi o faifeau na latou faatasi ai i lea taeao, ma tootuli atu ai ma le susuga i le Sea o le ekalesia Metotisi a le Sinoti a Salafai i Sasae, na vave ai loa ona tafa le finagalo o le tofa Pauli Ioane ma le aiga Sa Pauli, e tatala loa le auala.
Na lagona le leo o le tagi masusu o se tasi o tina o le nuu ina ua tootutuli faafeagaiga, ona o lagona ia o le matamuli pe a faatino e se tausi lafu mamoe se gaioiga faapea pe afai ua siliga se tuualalo e maua ai se matu palapala to e foia ai se faafitauli, aemaise o le polokaina o le alatele e Sakalafai ua afaina ai le fegasoloai o tagata o le motu tele, aemaise foi ua le mafai ona sopoia ai isi vaega o Savaii ma le oo ane i le uafu i Salelologa.
O le tetee o matai o le pitonuu i le Malo ona o le suiga o le itu auala le mafuaaga o le finagalo autasi o Alii ma Faipule e faatino le polokaina o le auala.
Ua faaopoopo i ai ma le finagalo tiga o le pitonuu i le Malo ona o nisi o mataupu sa feiloai ai muamua e faasino i o latou eleele o Salelologa ua faatau mo le fausia o le Taulaga faapea ma le taofia o le toe maua o seleni i le lisi o le fanua o loo iai le uafu, o le isi lea faapogai o le faaiuga e poloka le auala i le taeao o le Aso Gafua, 7 o Setema 2009 na amata ona suia ai le itu o le auala e feoai ai taavale.
Tali le Palemia i atugaluga
“O le mataupu lena e pau tonu a i le mamalu ma le paia o Tapa‘au le Falefia ma le Falesalafai. Ua uma ona talanoa minisita ma o le mataupu foi o loo aumai e i latou nei o mataupu tau faamasinoga, e leai se aia a le Malo i mataupu tau faamasinoga. E tulaga ese a le faamasinoga, e oo foi i mea tau fanua o la foi e i le faamasinoga”.
“O lea la o le a faaaoga sese i le mataupu lea ae o le mataupu e taoto tonu a i Alii ma Faipule o Salelologa faapea ma le Faasaleleaga”, o le tali puupuu lea a le Palemia ina ua tapa mo sona finagalo i atugaluga o Sakalafai. E pei ona silafia o loo taoto nei i le Faamasinoga o Talosaga Apili se tagi a le pitonuu o Sakalafai faasaga i le Malo ma le $4 miliona na faatau ai eleele o Salelologa mo le taulaga o Salafai. E lei tagofia lava lea mataupu e oo mai i le taimi nei.
