O loo faaauau pea ona agai i luma le taumafai a alo o Samoa i Niu Sila nei i taleni eseese e lē gata i taaloga ae o a‘oa‘oga foi.
O le afiafi o le Aso Sa na tea nei na tapena ai e le vaega o le Performing Arts a le MIT i Manukau, se polokalame, sa faaalia ai nisi taleni a alo o Samoa o loo auai ai i lea fuafuaga.
O i latou e aofia ai le alii o Benjamin Channing lea o loo faaautū i ai le play poo le Koneseti o le West Side Story, o Ala Tupai o se tasi foi tamaitai Samoa, e po lana vaai peitai e lei taofia ai lona naunautaiga ina ia faailoa lana taleni o le siva ma lona tomai i polokalame faapea.
O Milly Grant o le Samoa foi e iai lona pito Maoli ma Saina o loo auai ai foi i le koneseti faatasi ai ma nisi foi alo o Samoa o loo galulue faatasi ai i lea faamoemoe. O le polokalame sa faatautaia i le TelstraClear Event Center i Manukau.
O nisi foi o alo matutua o Samoa sa faia uma ni a latou vaega i lenei Koneseti e aofia ai le susuga Apelu Ifopo, Lilo Asiata, Pene Ueta ma Russell Wills.
O loo matauina lava le maoa‘e ua iai tomai o fanau a le atunuu i soo se matata, e pei foi ona iai le matagofie o lenei tala faatino e pei ona tapenaina e lea vaega a le MIT.
