O le faasolo atu i le masina o Novema seia pāia Tesema le masina faaiu o le tausaga, ua faapea foi ona amata tapenapena ai ma faamae‘a galuega ma polokalame faatino a le sosaiete a nai tamā ma tina matutua o le atunuu, le Tuaasinasina o Samoa i Aukilani, e pei ona faamautu ai lo latou nofoaga mo a latou faatasitasiga e faalua i le vaiaso, i le pitonuu o Mt Roskill i Aukilani.
E iai foi se isi sosaiete faapea o loo iai foi isi tagata matutua, “Le Auga o Aute,” lea sa tuufaatasia nisi o a latou galuega faatino i le vaiaso atu i ona tua.
Ae o le Aso Tofi, 22 o Novema na tapena ai loa le Tuaasinasina mo se latou tafaoga faaiu o lenei tausaga, lea na agai atu ai tamā ma tina matutua mo se maimoaga i le togalaau, le Manukau Botanical Gardens.
O le molimau a nisi o tina ma tamā matutua sa auai i lea maimoaga, e telē se aogā o le tafaoga mo latou. E lē gata o se faafouina o le malosi a o mānavaina ea felesi a o fesavalivalia‘i solo i lalo o laau pāolo, ae o se faafouina foi o le mafaufau, a o matamata solo ma māofa i le matalasi o foafoaga a le Silisiliese.
O lanu matagofie felanulanuai o fugālaau, le manogi sasala matagofie e puaina mai e fuga o laau; o se toe faamanatu ia i latou, o loo tausi pea ma alofa mai le Tamā o i le lagi ia i latou, seia oo mai lava i le sinasina ua afu ai o latou soifua.
O se faatini ua talafeagai lelei ma galuega fitā a nei tamā ma tina matutua o le atunuu, o i latou o loo nafa ma le tiute sili ona tāua, o le talosia ma taputapua‘ia tiute ma faiva o fanau, aemaise le upu taulogologo ma le upu faufautua i lea aso ma lea aso, auā se faamanatu e ta‘imua ai faiga filifiliga a fanau i aso taitasi.
Na mae‘a le maimoaga i le Botanical Gardens, ona agai loa lea o le Tuaasinasina mo le latou taumafataga faapitoa o le aoauli, i le Happy Days Restaurant i Manukau lava, ma faamae‘a atoa ai iinā le latou aso tafao i lea Aso Tofi.
E toatasi le sui o le sosaiete a “Le Auga o Aute” sa auai atu i le maimoaga i lea aso, o le latou Peresetene, le faletua ia Miliama Siitia, ae o le sui foi o le Tuaasinasina o Samoa. E toatele foi isi e lei auai, ona o mafuaaga tatau o le soifuaga.
