Malo lava le soifua manuia i le mamalu o le tatou au faitau, ma o se faaopoopoga foi lenei o le tatou itulau mo lenei vaiaso. E iai le talitonuga o loo tatou maua pea ni luitau ma nisi o vaega e faaopoopo i manatu ma finagalo, e ala i le faasoa mai o sui o loo autovaa mai i luga o le tatou itulau.
E saga faafetai pea i le afioga ia Afamasaga Telesia Alipia, mo vaiaso e tolu ua tuanai atu, sa tatou faitau ai i le tele ma le anoanoai o le tulaga tau a‘oa‘oga sa ausia ma taunuu i ai le soifua o lea tina o le atunuu. Faamanuia le Atua.
O le vaiaso nei o le a se‘i tatou faitau i se tasi o tamā o le atunuu, o loo vaaia ma faamaonia ai le alofa silisili ese o le tatou Matai Sili i le Lagi, e ala i le tofa faatamalii ma le atuafetalai ua faamanuiaina ai lona soifua, mai lava i le taimi sa avea ai ma tama talavou, seia oo mai i le taimi nei.
Atonu o se molimau ola lenei, aemaise ai o se faamaoniga o nisi o talitonuga ma upu e masani ai tuaa sinasina o Samoa, ua fai i lagi le folauga ma ua tofafa mai i tia sa, ma maota i tuugamau, ona o le valaau paia a le Atua.
O le tele o faaupuga ma talitonuga sa tuutaliga ma tuufaasolo mai i augatupulaga mai le fia o tupulaga ua tuanai, ae o loo faaauau mai pea ma ua oo mai lava i lo tatou foi vaitaimi. E talitonu Samoa o le poto o le mea foai mai a le Atua, o le ala foi lea e faapea ai saunoaga ma fetalaiga, o le faleaoga muamua o le tama ma le teine Samoa, o totonu lava o lona aiga.
O le faatinoina o le nofotuavae ma le fatuaiga e lē faigofie, peitai e talitonu foi Samoa, o le ala lea i le pule atoa ai ma le sasaa mai o faamanuiaga a le Atua i le tagata e tautua ma le faamaoni.
O totonu foi o faiganuu i le va o le faataunuuina o tiute faaaumaga poo le taulealea ma le fale o matai, e agiga ai foi saunoaga ma fetalaiga e faapea, Ia faamanuia le Atua ia te oe le taulealea, Ia utupupuina ma ia poto lou gutu e tautala. Ia fai oe ma fetu pupula i soo se tiute ma soo se galuega mo le lumanai. Ia osofia pea moegaluaga ma ia faagaganaina lou gutu i le poto ma le atamai.
O upu foi ia e lagona i totonu o se aiga i le va o matua ma fanau, ia poo le va foi ma matua o matua ma tuaa o tatou tuaa, pe afai na maua se taimi e mafuta iai, ma faatino iai le tiute o le taulealea ma le tamaitai Samoa moni o le tautua matavela, ma le tautua toto, ia poo le faatino foi i ai o galuega masani a o soifua pea.
Ua ou fiafia e toe faamanatu ia vaega o le soifuaga faa-Samoa moni sa maua ma ou faalogo foi a‘u i ai, a o faia lea faiva i totonu o le aiga i le va ma mātua, o le nuu i le fale o matai, atoa ai ma le tausiga o tuaa o o‘u mātua a o soifua.
Peitai ua saga toe fafagu mai ia lagona tāua ma le moni, ina ua feiloai ma talanoa atu, ma faasoa mai foi le tamā ua faatulagaina mo lenei vaiaso. Ae alo maia mo le faaopoopoga o le tatou itulau.
Faatili Ugavau Tamausu Tuileolo Fuaiavailili
Aso Soifua: 12 Iuni 1938
Afioaga: Lotofaga i Upolu, o Fagasa ma Iliili i Tutuila
Na soifua a‘e lava Faatili Fuaiavailili i lona afioaga i Lotofaga i mātua o lona tamā o Fuaiavailii e tupuga mai i le aiga Sa Fiame i Lotofaga lava. O lona tina e mai le afioaga o Fagasa ma Iliili o le motu i Sasa‘e poo Tutuila.
E lua isi suafa matai o loo umia ma faapaleina ai le afioga ia Faatili. O le suafa Tamausu mai le afioaga o Matatufu o le isi itu o lona tamā, ma le suafa Tuileolo mai Fagasa i Tutuila o le aiga o lona tina.
O le afioga ia Mataafa Mulinuu le Lua, o ia lea na faaeeina le suafa matai o Ugavau e pei ona ia tauaveina pea e oo mai le asō. E iai le uiga o le suafa Faatili Ugavau e pei ona ta‘ua e faapea o le uiga o ia suafa o Aliimau o Faleupolu.
Sa faaipoipo le afioga ia Faatili i le tausaga e 1960, ma e toaono ona alo, peitai ua maliliu uma, ma ua mae‘a foi ona tatala le faaipoipoga muamua ma le tina sa iai le fanau e toaono ua maliliu. Sa toe faaipoipo le afioga ia Ugavau ia Helen Stowers ma ua iai o la alo e toavalu ma o loo mafuta pea lava foi ma le faletua ia Helen Noaalofa Fuaiavailili i le taimi nei.
E maoae lava foi le talaaga o le afioga ia Faatili pe a vaavaai ma silasila i ai e tusa ma ana saunoaga. O le ala lea na ou muai ta‘ua ai i le amataga le uigaese ma le tulaga maualuga o faiga a le Atua i le soifua o lenei tamā. E moni ai lava le isi talitonuga a le atunuu e faapea, O le faaeaina, o le pitolaau a le Atua i le olaga o le tagata.
O le ulufale i a‘oa‘oga mai le amataga mo le a‘oa‘oina o le poto salalau e pei ona tausinio i ai le toatele ma tagata o le lalolagi, e foliga e tele sona fesootaiga ma le soifua a‘oa‘oina i faiga ma aga a Samoa lava latou ia. E tele sona fesootaiga auā e iai ona faamaoniga aemaise lava le taunuuga.
E tusa ai ma le faamatalaga a le afioga ia Faatili, sa ia ta‘ua ai o lona lava soifua ae i totonu o lona aiga ma lona nuu, e lei alu i se aoga, peitai sa aoaoina lava o ia i totonu o lona aiga ma lona nuu e ala i le tautua ma le tausi aiga. O le tausiaina o ona mātua e ala i le fatu aiga tausi mo aso faisoo, o lona faleaoga muamua lea, ma sa ia a‘oa‘oina ai le tele o faiga ma aga faa-Samoa, e talitonu sa aogā tele mo lona soifua.
O le isi faleaoga sa a‘oa‘oina ai, o le fale o matai poo le tautuaina o le nuu, i le va o le faleoo poo le fale o taulelea, ma le fale tele poo le fale o matai.
O le siitia mai i le vasega muamua o le tautuaina lea o lona aiga, agai i le vasega lona lua, o le fale lea o matai, sa ia matuā talitonu, sa tamaoaiga tele ai lona soifua seia oo mai i le taimi nei.
Sa faalogo ma le uistai, sa maitau foi ma le toto‘a a o iai i le vaitaimi o le taulealea ma faatino le tulaga o le a‘oa‘oina, mai lava i le taulealea seia oo ina faapaleina i suafa matai. Sa ia ta‘ua e lē faigofie le tulaga o le tautua, auā e lē ese ma le soifua a‘oa‘oina i le poto salalau ma le atamai faaonaponei.
O tiute sa faia i le aiga ma le nuu, sa amata a‘oa‘oina mai ai le tele o le tomai ina ua faaeaina e le Atua i galuega ma tofiga e pei ona auauna ai i le lumanai o lona soifua.
O le isi vaega tele o le soifua a‘oa‘oina, sa maua lava a o iai pea i totonu o le nuu, aua sa a‘oa‘oina ai le faalogo ma le tautala, o le āva ma le faaaloalo.
O le va o le tuagane ma le tuafafine, o le va o le tautua ma lona matai, aemaise lava o le va o le tagata laititi ma le tagata matua. O ia tulaga uma o le soifuaga faa-Samoa, a poto ma atamai ai, o le o faatasi lea ma le faamanuiaga mai mātua, aemaise ai o le faamanuiaga mai toeaiina ma tamā o le nuu.
O le tofia e fai ma taiulu i totonu o le aiga o le isi foi lea vaega o le soifua a‘oa‘oina. Ina ua avea ma matai ma tofia e vaaia aiga, o vaefa uma lava ia o le soifua a‘oa‘oina.
E faafasitepu a‘oa‘oga mai aoga laiti e oo i aoga maualuluga, kolisi ma le iunivesite, e faapea foi le soifuaga a‘oa‘oina i totonu o le aiga, nuu ma afioaga. O gaioiga uma lava sa faatinoina mai i le amataga, e afua ai ona faasolosolo agai i luga, ma o sitepu foi ia o le soifua a‘oa‘oina.
O le isi sitepu o le soifua a‘oa‘oina e pei ona molimauina e le tamā ia Faatili, o le tausia lea o le va ma le auauna a le Atua poo le faifeau. E tele foi a‘oa‘oga sa faia e auauna a le Atua i totonu o afioaga e faanofonuu ai, peitai e faamoemoe uma lava le manuia o ia a‘oa‘oga, pe afai e iloa e le tama ma le teine lona tiute ma lana galuega e fai i soo se taimi.
O le atamai e maua mai i totonu o aiga ma le nuu i le maota o tamā matutua, e lē toe mafai ona maua i totonu o faleaoga i ona po nei, poo iunivesite foi. Atonu e taulalata lava i ai i le taumafai a nisi e toe aoao ma faamanatu tu ma aga a le atunuu, peitai e lē mafai ona toe maua le avanoa sa faamanuiaina ai le autautua i aso ua mavae.
O le isi tulaga sa faailoa manino ma e talitonu foi i ai le afioga ia Faatili, o le soifua lea i faamanuiaga mai le Atua, e ala i le faamanuia mai o mātua ma auauna a le Atua, atoa ai ma matai o le nuu.
O le soifuaga mai Samoa sa a‘oa‘oina ai le tele o auala, faiga ma tu ma aga, ua mafai ona faamaonia ai le tāua tele ma le moni o saunoaga ma fetalaiga, aemaise o upu a mātua sa saunoa i ai i le tele o tausaga ua mavae, pe afai e toe manatunatu lelei i ai.
O le a toe faaauau atu le vaega mulimuli o le soifuaga o Faatili Ugavau Fuaiavailili i le vaiaso fou. Ae maitau ane pea ma silasila i ai i le tulaga e pei ona faamatalaina ai e lenei tamā lona soifuaga, ua atagia ai pea le eseese o auala e faaaogāina ai e le Tama o i le Lagi, o tatou tagata i ana meaalofa eseese foi.
