Ua amata lenei vaiaso fou i ni tala faanoanoa mo aiga ma uo faapea aumea mamae, tainane taitai o le tatou Malo ona o le valaau paia a le Atua i nisi o taitai sa tautua mo le atunuu e ala i auaunaga sa galulue ai mo le Malo i le tele o tausaga.
O le amataga o le vaiso na tuumalo ai le Afioga Anauli Pofitu Fesili sa nofoia se tasi o tofi faipule o nofoa e lua o le itumalo o le Vaimauga i Sisifo i le paeaiga a le Palemene mai le 2006 i le 2011.
O le Aso Sa na maliu ai lea tamalii ae Aso Gafua ananafi tuumalo le Afioga Ta‘inau Moefaauo Titimaea o lē sa avea ma Pule Sili o le Pulega o le Suavai le Samoa Water Authority, mo le sefulutasi o tausaga. Ua faafā ona tofia i lea tulaga ae toe lua tausaga o loo totoe o lana konekarate lona fā mo le tofi Pule Sili ae valaau lona matai.
Ua peia ai le taualuga o Manu‘a, gasetoto le masina ma taapeape ao ona ua fa‘ia nisi o poutu toa i totonu o le Malo, ekalesia ma nuu faapea aiga.
O le Afioga Anauli o ia na uluai faatuina le auaunaga tau falemaliu tuma‘oti e faagaioia faapisinisi, o se taumafaiga sa ese mai le auaunaga a le Malo o loo faia e le matagaluega o le soifua maloloina i le falemaliu masani sa taofia ai ē pele o aiga e faatali o latou toe sauniga aemaise le malaga mamao mai fafo o alo ma fanau ma sui o aiga.
O lea ua iai isi falemaliu tuma‘oti e lua, ae o ia lava le uluai Samoa na faagaioia lea tautua. O tausaga o lana tautua i le Malo ua silafia e le toatele a o avea ma Komesina o le ofisa o Lafoga le Inland Revenue i aso foi o fai ma maua lafoga totogi i le Malo pe a mae‘a tausaga taitasi.
E faatumu pepa ma ave i lea ofisa ona agai lea o tagata faigaluega e siaki pe toe maua ni seleni o lafoga sa totogi pe leai, auā o nisi e toe totogi seleni o lafoga. O na aso e manatu ai lea tamalii a o avea ma faauluuluga o lea ofisa o le Malo, ua tuufaatasia nei ma le ofisa o le Tiute i le matagaluega o Tupe Maua i nei aso.
O taimi o lona tofi faipule sa tulai faatasi ai ma se tasi o tamalii le afioga Patu Ativalu mo tofi o le Vaimauga i Sisifo i le Palemene. Sa saofai ai Anauli i nisi o komiti a le Palemene ma avea foi ma Minisita lagolago mo le ofisa o le suetusi sili a le Malo.
O nai tausaga e lei mamao tele atu ina ua lē toe manuia i le faigapalota mo lea tofi o lona itumalo, na molia ai Anauli ma nisi o matai o Tanugamanono i le faamasinoga e se tasi o aiga o le nuu ona o se faaiuga a alii ma faipule na faaleagaina ai meatotino a lea aiga, lea na tagi le aiga e totogi atu meatotino na faaleagaina ma manumalo ai i se tupe e lata i le miliona tala.
O loo tālia pea se faaiuga a le faamasinoga apili i le talosaga a alii ma faipule o Tanugamanono e aofia ai Anauli Pofitu faasaga i le taui e totogi e pei ona iai se iuga a le faamasinoga maualuga i le tausaga talu ai.
O le Afioga Ta‘inau Moefaauo o se tasi o tamalii sa iu mai ana aoaoga i Iunivesite i fafo ma ona faailoga inisinia lea na tofia ai e le Malo na te pulea le pulega o le suavai seia oo ina tuumalo.
E toatele foi nisi latou te silafia o ia i nisi o taleni ma atinae e pei o faigafaiva.
O nai molimau ua maua a o lei tuuina atu lenei tala mo le faasalalauina e faapea, o ni gasegase faafuasei na maliliu ai nei tamalii. Tau ina faamaise le Atua i fanau ma aiga aemaise o aiga na lua, o uo ma paaga a nei tamalii ona o le motusia o le mafutaga i le olaga nei ona o le maliu ma le oti. E lei iloa se aso e faia ai o la toe sauniga.
