Faatea le tumau Fiti ma Malo o le Taupulega

Ua faatea nei Fiti mai le toe avea ma sui o le lio o Malo o le Taupulega a Peretania le Commonwealth ina ua le ano ane lava le alii Palemia le tumau o lea malo, le taitaiau o le fitafita o Bainimarama, i le tuualalo a taitai o malo o le Taupulega e faailoa atu i le aso muamua o le masina nei o Setema le faatino o se faigapalota e toe sailia ai ni taitai o le atunuu i le tausaga fou.
O le faataunu ai o lea faaiuga, ua lipotia ai se finagalo o le Palemia susuga Tuilaepa L Sailele Malielegaoi ua ia valaaulia ai le Palemia le tumau o Fiti, Commodore Frank Bainimarama e malaga atu i Samoa la te talatalanoa atili ai i mataupu o lona malo.
E tele malaga tuusao mai i Samoa a kamupani vaalele ma e manatu le alii Palemia o se avanoa lelei lea e fofola ai so la fala ma Bainimarama ma toe soalaupule nisi o mataupu e faatatau i faafitauli o loo feagai ma Fiti.
O le avanoa foi lea e pei ona faaalia e Tuilaepa, na te faamaimoaina ai Bainimarama i vaega eseese o le atunuu sei silasila ai i tulaga o loo faafoe ai pulega i Samoa aemaise e leai se eseesega o le faamatai ma faiga tau tu ma aga a Fiti i ona alii sili ma tagata taua i lana aganuu.
O Bainimarama e iai ona sootaga tau aiga i Samoa ma e manatu nisi latou te silafia lea taitai o se avanoa lea e feiloai atu ai i ona tauaiga ma maua ai nisi mafaufauga lelei e faafoe ai ana fuafuaga faataitai o lona atunuu.