“E iai le aso, e mafuli mai ai maa tetele ma olopala ai Fausaga” – o se ulutala lea o se pepa na lomia ma tufa solo i le afioaga ma nisi vaega o Safata na mafua ai le faaiuga a le nuu e faatulai ese le faifeau o loo tausia le aulotu Aso Fitu Tutoatasi (SISDAC) i lea afioaga.
“E fesili atu i ai poo le a le uiga o lenei mea ua ia faia, ae fai mai le faifeau e moi le upu ua tusia i le latou nusipepa,” o se faamatalaga lea a le afioga i le Taulauniu, o le sui o le afioaga na mafai ona talanoa mai ina ua tapa i lenei faaiuga, o ia lea o Toeoso Taulauniu.
“Ua vaai i le matautia, ua faaleaga le matou nuu, ua faamata‘u foi le matou nuu, o le isi faaupuga ua faia faapea o tagata maliliu uma o Fausaga e le o oo i le lagi, ae o lea e feoai solo i le lalolagi nei i le po ma le ao,” o le toe faaopoopo mai lea o le Taulauniu.
O se faaiuga a le nuu na faia i le faaiuga o le vaiaso na tea nei ina ua maua e nisi o le afioaga le lomiga e pei ona ta‘ua.
O le lomiga lea (flyer) e faalauiloa ai ulutala o folasaga ma lauga e faatautaia e sui o le Aso Fitu mo i latou e auai atu ia latou sauniga. O le “toeaina” o le aulotu i Fausaga e mai i le afioaga o Vaiee ae e faiava i Fausaga e ana le lauga e pei ona faamalamalama mai e le ofisa o le SISDAC i Taufusi.
O lana lauga la lea na faaulutala faapea ae e foliga mai o lea ua tuuaia ai le faifeau i lana gaioiga na fai. “Ae e mo‘i,” o le lagolago mai lea a se tasi o faauluuluga o le lotu lenei, le susuga i le Faifeau o Pastor Tupou Te‘o ina ua tapa se finagalo o le ekalesia i le faaiuga a le nuu.
“E iai le fuafuaga o le a agai i le afioaga ma ia talosagaina le toe tatala o le tofa ma le faautaga, aua e foliga mai ua faatulai ese fua le faifeau ae e le o ia na faia le faaupuga, o le faaupuga foi e moni,” o le faamatalaga lea a Pastor Te‘o.
E iai le masalosaloga o le faauluuluga o le Aso Fitu Tutoatasi o auauna a le Atua i totonu lava o Fausaga, e foliga mai ua o latou ia ua ono fautuaina le pulega a alii ma faipule ina ia faia lenei faaiuga.
O le faamatalaga a Toeoso Taulauniu na fesiligia le faifeau i lenei lomiga ae na ia tali mai e sa‘o lava le valoaga lena ua fai.
“Na ou fai i ai poo fea o le Tusi Paia o ta‘u mai ai Fausaga i le tusi lea ua to mai ma lolomi,” o sana faaopoopo mai lea.
“O le nuu atoa lava na faia le faaiuga lenei e le na o ni nai matai, e matua le logomalie lava i le nuu ia ituaiga faamatalaga”.
E lei leva nei ona mae‘a se faaiuga a le Faamasinoga o Fanua ma Suafa na faamautu ai le fausia o le malumalu o le Aso Fitu Tutoatasi i totonu o le afioaga o Fausaga.
Na faasa e le nuu peitai na ta‘ua e Toeoso ua olo lava le fua i lea faaiuga ma ua usitaia lava le faaiuga a le Faamasinoga lea la ua talia ai le faatuina o le lotu i totonu o le afioaga.
Ona pau isi ekalesia o loo amanaia i totonu o Fausaga o le Ekalesia Faapotopotoga Kerisano Samoa ma le Ekalesia Katoliko, lea la ua tolu lotu i le Aso Fitu Tutoatasi.
“A o lea foi la ua faataga atu ma usitaia e le nuu le faatonuga e faatu ma faia le lotu i totonu o le afioaga, ae o lea foi ua fai mai ia faamatalaga faapea i le nuu e pei e foliga mai e faatautee ai i le afioaga,” o le upu lea a Toeoso.
“O le faaiuga foi a le nuu e le tapunia fua le lotu, ae na o le faifeau ma lona aiga ua faatulai ese. O le tala ua fai i le matai o le lotu lea ua fesootai ma le afioaga ma o loo i totonu o le saofaiga a le nuu, e leai se mafuaaga o le a taofia ai fua le lotu ma ia aumai se isi faifeau e sui ai le faifeau lea ua faatea”.
Faaalia foi e Toeoso a mae‘a le vaiaso lenei e le alu ese le faifeau o le a faasala loa Toleafoa Mano, le sui lea o le lotu i totonu o le afioaga.
Faaalia e Pastor Te‘o, o le a feutagai pea ma le afioaga ma ia saili se auala e mafai ai ona foia lenei faafitauli ua tulai mai, ma le faamoemoe ia toe masuigamalie lenei faafitauli aua a alu atu foi se isi faifeau ae fai se folasaga faapea, o lona uiga o le a faatea foi.
