E toalua alii leoleo o le falepuipui i Tafaigata ua faamalolo ma a la galuega ona o le faatamala i le tatala o sela poo potu ia e taofia ai pagota.
O le la gaioiga na ta‘ua e Leoleo ua tatala ai ma le avanoa e agai mai i fafo pagota ma o le maliu o le alii Niu Sila o Hans Dalton na maua ai i suesuega a leoleo na tatala uma potu ia e lima e i totonu o le poloka sa taofia ai lea alii.
O loo masalomia o le tatala o potu nei na sao mai ai lē ua molia i le maliu o lea alii Niu Sila ma faatino le faaoogalima ua maliu ai Dalton.
E lei faamaonia lea tulaga ona o lea ua faatoa tulai Jonathan Patrick Crichton i luma o le faamasinoga i moliaga o le fasioti tagata faamoemoeina, ae ona pau le tulaga ua faamautu o lea ua faatea alii leoleo nei e toalua.
“O tulafono lava ia o le falepuipui e loka uma lava potu nei e taofia ai pagota ma e oo lava foi i le fale tele lea e iai potu nei e loka lelei lava lona faitotoa peitai o suesuega ia ua maua ai e lei faia le tiute o leoleo i le taloka uma lea o nei potu, ua matuā faatamala tele nei faiga,” o se saunoaga lea a Leaupepe Fatu Pula ina ua tapa i sona finagalo i lenei suesuega.
“E matuā faasā lava ona tatala potu nei pe a oo i taimi e agai ai i totonu pagota.” O lea foi la ua toe faamalosia tulafono nei a le Falepuipui ma ua siaki i po uma le tulaga o iai potu taitasi ina ia mautinoa e lē sao mai i fafo se pagota.
O Dalton o lea na iai le lipoti muamua a le Vaega o Falepuipui faapea na pule i lona ola. O se alii e iai manaoga faapitoa o lona mafaufau ma na ave i Tafaigata ina ia tau taofiofi ai ua oso le ma‘i.
O le ave la lea o lea alii na maua ai lona tino maliu i fafo ane o le fale sa taofia ai i le aso na sosoo ai.
