E toatele le au faasalalau i leitio a le Pasefika ma Asia, e aofia ai ma le Radio Samoa, sa auai i se polokalame faalea‘oa‘oga sa faia ma tuufaatasia e le Matagaluega o Taui o Faalavaelave Faafuasei (ACC), ma fesoasoani mai i ai le Maritine NZ, faapea le Coastguard NZ, ma le Pulega o Taulaga (Harbour Master).
O le autū ma le sini o ia a‘oa‘oga, sa taulai lea mo le au faasalalau, ina ia molimauina le tāua o lapataiga ma puipuiga mo le saogalemu i luga o le sami ma gataifale o soo se vaega o le atunuu.
O le faaaogāina o le aufaasalalalu, ona talu ai e tele se sao o le latou galuega ma tiute i luga o le ea ma faasalalauga faalauaitele e avea ma auala e momoli atu ai ma faaoo le feau tāua mo le saogalemu.
E lē gata i lea, ae ao foi ona manino lelei i latou i le tulaga o le matautia o aafiaga ma le ogaoga o faalavelave tutupu, pe afai e lē usitaia ma logosaia fautuaga ma lapataiga mo le taimi e soua ai, ma matagia le sami ma gataifale i uiga loulouā o le tau, ia poo le taimi foi o faalavelave faalenatura.
Ae sa faapitoa aoaoga sa faia i le vaiaso talu ai, i le tulaga o le tausia lelei o le saogalemu ia i latou e sauni ma fiafia e faia faiva ma fagotaga. O le faaaogāina o vaa ma ālia i lona tautaiga atoa ai ma vaega uma e manaomia mo le puipuiga lava o le saogalemu.
E lē gata i vaa fagota, ae faapea foi vaa mo tafaoga a aiga ma tagata lautele poo malo foi e fai mai i totonu o le atunuu. Sa ta‘ua e le susuga ia Asiava Atonio Tuipea, o se tamalii Samoa mai le Matagaluega a le ACC, e telē se tāua ma le aogā o le polokalame sa faia. Aemaise lava o tagata Pasefika e ao ona lava tāpena ma saunia lelei a o lei agai atu mo fagotaga ma faiga faiva.
E tusa ai ma faamaumauga a le Matagaluega a le ACC i le tausaga talu ai, sa maoae le oso maualuga o le fuainumera o faalavelave o le malelemo sa aafia ai tagata Pasefika i le sami ma vai.
O faalavelave sa oo ai lava ina maliliu, a o nisi sa lē mafai ona toe maua mai. O tulaga tāua ia ua mafua ai ona faatautaia ma faagasolo lea fuafuaga tuufaatasi.
O le tāua o le auai o le aufaasalalau i leitio ma alaleo, e fai ma fofoga taumomoli mo le faalauiloaina pea o tulaga tāua mo le saogalemu i taimi o faasalalauga.
O le susuga ia Tavai Meni sa auai atu i ai i le polokalame faalea‘oa‘oga sa faia i le vaiaso talu ai, e fai ma sui o le Radio Samoa.
