Na alausu tagata atumotu o le Pasefika i le Aso Toonai na tea nei, i faatauga o le faaiuga o le vaiaso ma tapena ai mo le aso o tu ma aganuu, siva ma faafiafiaga aemaise o le faaaliga o laei ma taumafa mai motu eseese.
O le UPCOV o se faalapotopotoga mo tagata Pasefika, o lo latou faamoemoe lea ina ia tumau le faatāuaina o tu ma aga na masani ai mai atumotu. O se maitau i ai i le faamoemoe, na taulamua nai o tatou tagata Samoa i faafiafiaga ma siva, pei ona iai le sao a le ausiva a tamaitai lalelei le Nesian Pearl, le autalavou a le Ekalesia Metotisi i Hampton Park a le susuga i le faafeagaiga ia Faletui Finau ma le faletua ia Osooso, ae taualuga i le sao matagofie a le ausiva malosi le Sons of Samoa.
Na taulamua foi i faleaiga na faatauina ai taumafa Samoa e pei ona iai le sao o le afioga i le faletua ia Su‘a Faatau ma nai ona alo, le susuga ia Uili ma lana laulau keke, aemaise o le BBQ a le Fono Faufautua na tautua ai le afioga ia Lemalu Faatau ma le fetalaiga ia Tauga Konelio.
Na maitauina foi le toatele o le paia lasilasi o Samoa na afifio atu. Na faafiafia ai foi sui mai Rarotoga, ma faaali ai a latou laei, faapea foi a latou taumafa, aemaise o sui mai Niue ma a latou foi faafiafiaga ma taumafa.
O se vaaiga lea e lē o maua ma vaaia soo i le aai o Melepone, o teuga ma laei faa-Pasefika i nofoaga faitele, aemaise o pesega ma siva ma taumafa foi. Sagisagi fiafia tagata uma e pei e masani ma aiga e tasi, mai lava i nai tamaiti seia oo i ao sinasina, na faaiu i le usuina o le ‘Lota Nuu’ ma taumavae ai.
O anavatau nei o loo faaali ai le agaga saili malo o nai o tatou tagata, ma atili iloa ai la tatou tagavai i totonu o nei atunuu tetele. Saunoa le susuga ia Temese Leilua o le sui Samoa i le UPCOV, o le tausaga fou o le a sili atu le telē ma manaia.