E ta’i lima tausaga ma faataunuu le faatasiga poo le reunion, a le aiga sa Lemalufaitoaga i Nofoalii, e faapitoa lava i suli o Pio.

O le vaiaso na tea nei na potopoto uma ai i Samoa suli ma feoi o le aiga i suli o Pio mo le faataunuuina o le faatasiga a le aiga.

O le St Therese Resort and Retreat Center i Leauvaa na faaataunuuina ai le faamoemoe, lea na amata mai i le Aso Gafua aso 7 o Ianuari ae faamae’a i le Aso Faraile, 11 Ianuari.

O le autu o faatasiga a lenei aiga, o le fia faamasani lea o fanau lalovaoa a le aiga, ma o se avanoa foi e moli talosaga faatasi ai le aiga i le Atua, ina ia musuia loto o fanau e ofoina atu lo latou soifua e tautua ai mo lana galuega.  I le taimi nei o Lupe Faalele a le aiga o loo tautuaina le finagalo o le Atua e aofia ai, le afioga ia Patele Kolio Kelekolio, o ia foi o le sui Epikopo o le puleaga a Samoa Apia, o le afioga i le tiakono ia Paselio Lemalu ma le faletua ia Imeleta o loo galulue nei i Melepone Ausetalia.

O le susuga i le Fesoasoani Katoliko ia Manupo Aukuso ma le faletua ia Lautasi o loo galulue nei i le afioga o Tuana’i, o le afioga i le Tamaitai Sa ia Palepa Numi o loo galue nei i totonu o Samoa, faapea le afioga i le Tamaitai Sa ia Palepa Aukuso o loo galue nei i Amerika Samoa, ma le alii o Tupuse M Aukuso sa galue faamisionare i Cebu Filipaina.

O lenei aiga na soifua mai i le ekalesia Katoliko, e ui o loo iai nisi o le aiga ua tapuai i nisi o ekalesia, peitai, a potopoto le aiga o le ekalesia Katoliko lava e faavae ma faafoe ai ana polokapame. I le vaiaso atoa o le faatasiga, sa faaautu lava lauga ma talosaga i le alofa. O le alofa o le la tu o mea uma.

E lē mafai ona e folafola lou alofa i le Atua, ae e te lē alofa i lou uso a tagata.

O le Aso Gafua na feiloai ai le aiga, e ala i le ‘ava o le feiloaiga, ma faagasolo ai polokalame o le reunion, e aofia ai le aso faapitoa o le gaseseina o taumafa faasamoa, o le aso foi lea na ave ai fanau a le aiga aemaise i latou o loo soifua i fafo, e matamata i fanua ma eleele na soifua mai ai le aiga.

O le faatalatalanoaga faafinauga (debate) e faatatau i faalavelave faa-Samoa, ma ona aafiaga i totonu o le aiga.

Na vavae ai mātua latou te finauina le tāua o faalavelave faa-Samoa, ae o fanau na o latou finau tetee i faalavelave faa-Samoa. O se finauga na aumai ai lagona o le fanau i le latou vaai i mea nei o faalavelave ma ona aafiaga i olaga o aiga. Peitai, na faapea foi ona mausali le finau a mātua, o faalavelave, o le ute o le soifuaga faa-Samoa, a mamulu ese, ua faapea foi ona afaina atu ai ma le aganuu pele a Samoa.

E tele manatu lelei na maua mai i le finauga mo le agai i luma o le aiga.

O le aso faapitoa mo taaloga ma le aso faapitoa na tafafao ai le aiga atoa i le matafaga matagofie i Matareva, ae taualuga i le po o faafiafiaga faa-Samoa a atunuu eseese o loo alaala ma papaaao ai suli o le aiga.

O lea po matagofie sa mafai ona faatasi atu iai le afioga i le Faipule o le Itumalo Aana Alofi No.2, le tofa ia Ili Setefano ma le tausi, o le taumafataga o lea po na tapenaina e aunoa ma se totogi, e le afioga i le alii Minisita ia Sala Fata Pinati ma le faletua ia Peseta Te’omatavu’i Silia ma le faleaiga lauiloa le Pinati Restaurant.

O le Aso Faraile na faamae’a aloaia ai polokalame o le reunion, ae o le Aso Sa na taualuga ai mea uma i le toonai a le aiga na faia lea i le maota i Logomasa i Nofoalii lava.

O le avanoa foi lea na talanoaina ai le isi reunion o le a sosoo ai. Ua autasi ai le feoi ma suli o le aiga, o le a tuu mai i luma i le tolu tausaga ma faataunuu reunion.

O le isi la faatasiga ua fuafua e amataina i le aso 3 o Ianuari 2022, mo aso e fa, ma o le a faataunuuina lea i le aai o Melepone i Ausetalia.

E lē faigofie le faamavae ma faatofa, e pei o le talitonuga masani, e faigofie ona feiloai ae faigata ona faatofa.

O nisi o le aiga na tuua Samoa i le Aso Sa ma toe foi atu i atunuu o loo aumau ai, ae o nisi o loo faaauau pea faigamalologa i Samoa.

E silia ma le onosefulu suli o le aiga na malaga atu mai atunuu i fafo, faatasi ma suli o loo aumau ma papaaao i Samoa, na potopoto faatasi mo le faataunuuina o le reunion.