A o tulimatai ma sagisagi fiafia le lalolagi i fiafiaga, faiga malologa ma tafaoga o aso fiafia ma aso mālōlō o le 2010, ae o le taimi lea ua mae‘a foi fuafuaga faataatitia ma filifiliga o le loto o le tagata ia i soo se vaega faapea ala tonu o le Alii.
E ui i se naunau fia taalo ma se momotu gatā o le olaga tafao a o iai i le osoosoga o le malosi o le susuga ia Taliilagi (Lagi Setu) e pei ona lauiloa ai i le ‘au lakapi a le Broncos, peitai na mautu lava lana filifiliga o le a se‘i tautau ona seevae lakapi ae alo atu se‘i auauna i lona Matai.
O lana miti na ia faananau lava i ai ina ia avea o ia o se talavou e tala‘iina le finagalo o le Tamā o i le lagi ma e lei faigofie foi lana filifiliga.
O le susuga ia Lagi Setu o se talavou e usitai i ona mātua ma ava i soo se tagata. E filemu ma lotoalofa.
O nai ona tuaa o le afioga i le Gafatasi ia Fuimaono Aukuso (Salani & Falelima) ma si ona tinā ia Silipi Setu mai Sili i le Falefa.
O le po o le aso Kerisimasi na faia ai se faamavaega tele a le Uarota a Bundamba e faatofā atu ai i lea foi talavou ua filifili lona mafaufau e tuua ona aiga, uo ma ē masani ma lana taleni o le lakapi, ae malaga atu mo lana faamisiona i Egelani.
Na faatumulia lea faatasiga i nisi o tama taaalo faapea le Uarota.
Sa taitaia lea sauniga e le susuga ia Bishop Alema Lealaogata, ma sa lagolagosua nisi o fesoasoani muamua le susuga ia Pa‘o Chricton faapea le susuga i le fesoasoani muamua ia Tuioti Setu.
Sa taalo Lagi i le ‘au lakapi a St George i le aai o Niu Sa Uelese, ma faapea ona saini mai ai e le ‘au a Broncos le konekarate mo le lua tausaga.
O le Aso Gafua, aso 27 Tesema 2010 na tuua ai e le susuga ia Lagi Ausetalia ae malaga atu i Egelani e tali le valaau e ala i le tala‘iina o le finagalo o le Tamā o i lagi.
E lua tausaga o le a toesea ai o ia mai lona aiga e pei ona masani ai alii faamisiona o le Ekalesia o le Aupaia o Aso e Gata Ai.
Ua matuai misia nei o ia mai totonu o si ona aiga, auā faato‘ā feiloai lava pe a mae‘a le lua tausaga.
O loo nofo tatalo nai ona mātua ma le aiga faapea le Uarota e tusa ai ma le toesea o lenei alii, le susuga ia Taliilagi Setu.
