Sa faatumulia le potufono i le Mercy Convention Centre i Ueligitone i le Aso Faraile 23 Mati, i sui o le Au Faufautua Pasefika mo mataupu tau Pasefika mo le Ofisa o Aoga, Puleaoga Pasefika i Niu Sila, aemaise foi le Au Suesue Pasefika e faafeiloai le tamaitai Minisita o Hekia Parata.
Nisi vaega o lana saunoaga, o tagata Pasefika e tatau ona,“Soifua ma galue e faataunuu manaoga o lenei vaitau, ma ia opogi le iloa mai isi aganuu, mo lou lava soifua laulelei, ma ia e faapelepele i au measina mai ou tuaa, o le amataga o ou mitamitaga, ma lou faasinomaga, ma tuu atu lou agaga i le Atua, o le amataga o mea lelei uma.”
Sa matuā manino i saunoaga a le tamaitai minisita lona faatāuaina o gagana, tu ma aganuu a tagata Pasefika. Sa ia faaalia e tatau ona matuā mautinoa e soo se tagata poo ai ia. O se mitamitaga tele ia te ia ona o ia o le minisita o aoga, faapea foi mataupu mo tagata Pasefika [Ministry of Pacific Island Affairs], o le a matuā faigofie ai ia te ia ona faataunuu ona tiute mo tagata Pasefika – O le siitia lea o le tulaga o aoaoga mo tagata Pasefika uma ma ia siisii le tulaga o tusipasi ina ia maua ni galuega totogi lelei. O le faamoemoe a le malo ina ia faamalosia ma atina‘e avanoa mo tagata Pasefika, a o le autū lava o lea faamoemoe, ia matuā faaleleia avanoa i aoga ina ia siitia ai tulaga o aoaoga o fanau Pasefika.
O lona naunautaiga, ia toatele pepe ma tamaiti laiti Pasefika e auai i aoga amata e tapena ai ina ia lelei ma fiafia le amataga i aoga tulagalua, ia taunuu atu ma sauni loa ina ia aoaoina. Sa ia matuā faamamafaina le saunia maeaea o polokalame a aoga ina ia talafeagai ma manaoga o tamaiti, matua ma tagata lautele o le Pasefika.
Na te lagolagoina malosi Matati‘a mo tamaiti o le Atunuu atoa – [National Standards], ona e vave ai ona matauina vaega ua mafai ona ausia e le tamaitiiti, aemaise foi vaega e manaomia le faaleleia atili ina ia ausia matati‘a ua fuafuaina mo laasaga eseese o le taumafai o le tamaitiiti. O se auala lelei foi lea e faigofie ai ona matauina aoga ma faiaoga o loo lava tapena mo le aoaoga aemaise le iloiloina o fanau.
E lē gata foi i lea, ae faigofie ai foi ona matauina aoga o loo lē talafeagai a latou polokalame e faamalie ai manaoga o tamaiti Pasefika, aemaise foi faiaoga e lē o lava tapena i le faatinoina o o latou tiute i totonu o potu aoga.
O se tasi lea o vaega o loo galulue ai nei le ofisa o aoga o le fuafuaina lea o faafouina mo faiaoga ina ia avea ma ni faiaoga e matuā agavaa i le aoaoina o tamaiti mai atunuu eseese e lē gata i le eseese o gagana tu ma aganuu, ae eseese foi faamoemoega mo le lumanai.
E manaomia le saunia lelei o tamaiti ina ia oo atu i aoga maualuluga, ua saunia lelei tomai e mafai ai ona feagai ma lui o mataupu i aoga maualuluga, ina ia toatele e faaiuina ma ni pasi maualuluga e ofi atu ai i iunivesite poo ni galuega sa latou fuafuaina mo le lumanai.
Na matuā malosi lana faamalosi ma saunoa ai, “O tatou uma e tupuga mai i tuaa sailimalo, o tagata folau, suesue, e lē fefefe e tauivi ina ia manumalo. O tatou uma na tutupu mai i tuaa na malaga mai i le vasa tele e saili ni nofoaga e nonofo ai mo le manuia mo latou fanau, fanau a a latou fanau, mātua ma tagata uma. O tatou uma o vaega o lenei vasa tele ua tatou faatasi uma ai i o tatou Faasinomaga, o tatou o Tagata Pasefika.
“E iai le matafaioi a le Malo, e faapena foi tatou uma – toaaga e talanoa, pepese, tatalo ma faaaogā a tatou gagana.”
Na matuā faamalieina i latou uma sa aofia i lea aso i le saunoaga a le tamaitai minisita, ona o vaega sa ia saunoa i ai o vaega ia o loo avea pea ma papupuni i le taumafai o alo ma fanau mo le tele o tausaga, aemaise lava o le lē talafeagai o polokalame fuafuaina, faapea foi le lē talafeagai o auala o aoaoga i totonu o potu aoga, ma le lē malamalama o faiaoga i manaoga o le fanau aemaise faamoemoega o mātua. O se tasi vaega tāua, o le taumafai lea i ni auala ina ia suia ai uiga ma manatu o aoga, pulega, komiti faafoe ma faiaoga i tamaiti Pasefika, ae ia matuā galulue tagata uma e faaleleia avanoa mo tamaiti Pasefika uma, mātua ma tagata lautele. Ia matuā faatāua ma amanaia faasoa a mātua ma tagata lautele i le fuafuaina o polokalame a le aoga aemaise polokalame o potu aoga.
O se faamamafa tele lea o loo ua tapena nei i ai le fuafuaina o le polokalame mo tagata Pasefika [Pasefika Education Plan], o loo ua amataina nei lona toe fuafuaina e faamoemoe ia oo atu ia Iulai i le tausaga nei ua mae‘a ona tapena.
Sa faaiu le saunoaga a le tamaitai minisita i le ofoina lea o lona malosi atoatoa, ma lona tomai ina ia galulue tagata uma e siitia le tulaga o aiga ma tagata lautele uma o le Pasefika i Aotearoa.
Ia tatou talia ia lupe o maunu e pei ona saunoa i ai le tamaitai minisita, atonu o se amataga lelei lea ma o se tali foi lea o talosaga ona o lu‘i ma papupuni o loo fetaiai pea ma fanau i totonu o aoga, aemaise le lautele i soo se faalapotopotoga ma galuega e feagai ai.
Ua leva lava ona matauina le tuuaia o fanau ma mātua i faaletonu i totonu o aoga, ma manatu ai le toatele o fanau Samoa poo le Pasefika o ni tamaiti e lē faaaloalo ma e lē fiafia e aoaoina.
A o le suesuega na faafoeina e le polofesa mai le iunivesite a Aukilani sa faatinoina i totonu o Magele ma Otara, sa ia ta‘ua ai o se auala lea e vave ona alo i ai aoga ma faiaoga, pe a tulai mai se faaletonu, o le tuuaia lea o fanau ma aiga, a o le mea moni, o le mafuaaga o ia faafitauli, o totonu lava o aoga ona e lē o faamalieina manaoga o le fanau, e lē amanaia ma faatāuaina gagana tu ma aganuu a fanau ma o latou aiga, faapea foi tomai ma taleni e ulufale mai ma fanau i le aoga.