A o tau lalata mai vaitaimi e faatosinaina ai tupulaga talavou ona o le feilafi mai o tuinanau o le olaga, e lē gata i lea o le vaitaimi e ta‘ua o le vaitau o faiga pātī.
Na tonu ai ni manatu ma silasila mamao i ai le ekalesia aoao a Kuiniselani ma nisi o Uarota ma Stakes, i ni auala e puipuia ai tupulaga mai ia faaosoosoga.
O le tele o Uarota a le ekalesia, o loo saili lava sailiga seleni poo fundraising e saili ai se faamāmāavega i mātua. Ua iai nei le faamoemoe o le a iai se nofoaga i Kuiniselani o le a tuufaatasia ai tupulaga uma a le Ekalesia Mamona i vaitaimi o tuuaga o aoga, e o atu ai e faaalu faatasi lo latou taimi e matamata ai a latou taaloga ma fefaamasaniai atili pea tamaiti poo le youth lea e i le va o le 14 e oo atu i le 18 tausaga.
O le Uarota a Forest Lake, sa faia se latou luau night i le po o le Aso Toonai 30 o Oketopa, ma na vaaia le ofoofogia o le toatele o le au lagolago. Na matagofie tapenaga a le autalavou ia latou faafiafiaga, o pese, siva ma taleni, ma sa mātua vaaia le tumu i le aumaimoa. O le po lava lea sa fesoasoani mai ai le susuga ia Ben Hannat (uso o le Epikopo -Bishop Adam Hannat) i se jersey taalo sa ofaina mo le autalavou a le Ekalesia a Iesu Keriso o le Au Paia o Aso e Gata ai i Forest Lake. Na taulia i lea po le jersey i le $370.00 na faatauina e le tamasii mai Tonga. E pei ona silafia o le alii taalo lea sa taalo i le ‘au a Canterbury Bulldogs, lea ua toe foi mai ma ua sauni atu nei e toe taalo i le ‘au a le Broncos i le tausaga e 2011.
Mamafa ma sasala le fofoga taumafa, ma sa see lelei foi le saasaa i le musika malie a le DJ, le susuga ia Vaega Lang Shu.
O le tamaitai o Rosita Sione sa ia faamaopoopoina se seleni e tusa ma le ono afe tala ma ona tupu.
