O le Aso Toonai aso 10 o Setema na fuafuaina e faataunuu ai le faatāuaina o tu ma aganuu, laei ma taumafa Samoa moni e tupulaga talavou tamaitai na soifua a‘e i nei atunuu i totonu o le ekalesia o le Aupaia o Aso e Gata Ai i Bundamba.
O lea Uarota o loo tausia e le susuga ia Bishop Alema Faasolo Lealaogata ma le faletua ia Itele.
O le tele o gaioiga sa faatinoina lava e tamaitai mai le 12 e oo atu i le 18 tausaga i lalo o faatonuga ma faamalumaluga a mātua faapea le fofoga o le aso, Lagi Tanielu (Fesoasoani muamua Peresitene o tamaitai talavou).
Sa saunia se suavai o talo, fa‘i, ma le manufata sa faavai, fai‘ai valuvalu, faatasi ai ma kuka e pei o le sapasui ma fai‘ai eleni.
Na vaaia le agaga naunautai o nei alo ma fanau i le tapenaina ma le faatinoina o le gaseseina o nei taumafa. E tāua tele lenei polokalame i le maitau e ono tapenaina ai ma faamausalī ai le agai i luma o o latou olaga e tapena ai mo le lumanai.
Sa matagofie foi le faatinoina o le ‘ava o feiloaiga sa paluina e le tamaitai o Janet Ah Shiu, ma le ‘au tautu ‘ava –Laveaitigā Brown ma Mafutaga Fesola‘i.
O le susuga ia Hinckley Tavita sa feagai ma le lauga faafeiloai, ma o se vaaiga ofoofogia ma le uigaese o le gagana sa faaaogāina e i latou nei.
O le fesoasoani lua lava le susuga ia Pa‘o Chricton na ia saunia se apoapoaiga i se upu faalaeiau mai le Faataoto e 22:6, i le itula e 6 afiafi o le Aso Toonai lava lea.
Na sosoo lea ma faaaliga laei faasamoa moni e pei o laei Samoa sa laeiina e le tamaitai o Hellen Tuilagi, e lē gata i lea o puletasi ma olomuu.
Na pisa aumaga ina ua fu‘e le suavai ma tofoina ai loa taumafa sa faavelaina e pei ona nofo tatali i ai le toatele, ina ua mae’a fuafuaga uma i le afiafi.
Na taualuga le po i le saasaaga faasamoa a le tamaitai o Anufesaina Lealaogata, o le alo o le susuga ia Bishop Alema Faasolo ma le faletua ia Itele Lealaogata.
