E taitasi i le tausaga ma faamanatu le aso faapitoa mo tupulaga talavou a le Faasinoti Ekalesia Metotisi i Kuiniselani nei, e pei ona atofaina i le Aso Sa lona lua o Fepuari o tausaga taitasi.
E pei ona masani ai aso o tina, aso o tamā, aso o le fanau, e faapena foi le aso ua faailogaina e patino lava lea i tupulaga talavou.
O le taeao la o le Aso Sa, aso 13 o Fepuari na faataunuuina ai lea aso faapitoa, e faamanatuina e tupulaga uma o ekalesia Metotisi i le lalolagi atoa. O le auga o aute, o le faatāuaina lea o le sao o tupulaga talavou i le galuega tala‘i i lalo o le Koneferenisi Samoa.
O le tele lava o tala faaleagaga, pese, lauga ma faaevagelia sa nafa lava ma faatinoina lea e tupulaga talavou faapea alo ma fanau.
Ua leva ona loma ma tapena mamao mai fuafuaga o lenei tausaga, ma e faia lava sauniuniga a le matagaluega ia i le latou falesa. Mo le silafia o le afioga i le Sea ia Soofa Mulipola ma le faletua ia Logotaeao o loo fauluulu i ai ekalesia o le faasinoti a Kuiniselani.
Ua tupu ma ola le galuega ma ua ta‘ape foi le galuega tala‘i a auauna paia a le Atua e ala i le laveaina o agaga e lē gata o ē matutua ae faapea le autalavou. O le susuga ia Rev Sailiai Tumaai o le failautusi lea o le faasinoti, ma e 13 ekalesia o iai i le taimi nei.
O nisi o tausi matagaluega ma faletua mo le silafia e le aufaitau, o le susuga ia Rev Sailiai & Tava‘e Tumaai, Rev Ioane Tuupo & Maria, Rev James & Ana Matamua, Rev Si‘ologa & Atonia Mapuilesua, Rev Matuu & Kuini Taufua, Rev Mika & Lora Sami, Rev Fereti & Mua‘ina Vaalepa, Rev Laauli & Nasareta Leiataua, Rev Iakopo & Falute Falefitu, Rev Pa‘ulia & Tesema Vaalele ma le susuga ia Kueva ma le faletua ia Selesa Tuimauga, faapea le susuga i le faafeagaiga ia Moloka Tua o ia o le ta‘ita‘i o autalavou a le faasinoti Aoao i Kuiniselani ma lona faletua ia Uaine Tua.
Na ‘au o manū le aso faapitoa mo tupulaga talavou i le alofa ma le faatasi mai o le Tamā i le lagi.
