E ui lava ina aumau i atunuu i fafo, peitai e lē mafai ona momotu le alofa faaleuso ma faaletuagane auā e tasi le loto sa faavae ai mafutaga faaleaoaoga.
O le tau to‘a ane o le pisi i tapenaga o le Iupeli Auro o Samoa i Brisbane, ae faapa‘ō loa foi ma le tauvaga karioki e pei ona faia i le pō o le Aso Toonai aso 16 o Iuni i le itu i Matu o le aai nei.
O le tele o Asosi o tamaitai ma alii tuai o le Ekalesia Katoliko e pei o Paulo le ono e le mapu le galulue malosi e saili seleni e fesoasoani atu ai i nai uso aooga oloo fai a‘e ma tutupu a‘e i Samoa e ala lea i le faatupeina o a latou sikolasipi.
Na faatumulia ma mamalu lea po auā na mafai ona auai le afioga ia Patele Epati Tamati, o le taitai o le puleaga Katoliko a Kuiniselani, Rev Perelini Tauilo – Faafeagaiga EFKS faapea le susuga ia Ps Sakalaia Satui faapea le faletua ia Ps Sekolasitika Lemana-Satui, o se sui o le Asosi o loo galue nei o se faafeagaiga i le Ekalesia Uesiliana Metotisi Forest Lake.
O le Peresitene o le Asosi a Paulo le 6, o le faletua ia Telesia Leota, Sui Peresitene o Tala Nimo Forbes, Failautusi o Jayne Pilia‘e, Teutupe o le faletua ia Tili Tauilo.
Sa lagolagoina malosi e le ofisa malaga a le Sina World Travel & Imez (Lemalu Patricia & Steve Sevele); faletaavale a le PrimOZ (Dean), Uncle Sam’s Catering (Poulava Sam & Lorna Matautia), Enchiro Laei, Containers & Printing (Galumalemana Harry & Apu Timoteo), Wkk Super Supper (Pauli Atipopo & Line Wongkee), faapea le alaleo a le 4EB.
O le tamaitai na manumalo i le tauvaga pese o Linda Mate. O le tauvaga a le autalavou o Karl Chong Knee, ma le tauvaga a le aumatutua o le afioga ia Salā Kelemete. E momoli le agaga faafetai i nei faletua ma tausi, faapea tamaitai ona o le alofa lē faatuaoia oloo sisi a‘e ai le faamalama ma auauna i nai fanau o a‘oa‘oina i Samoa i aoga sa faapea ona fofoa mai ai le atamai i taimi ua alu.Sa matagofie foi lea faamoemoe e ala i le auai o le tausala le tamaitai lalelei o Sophia Pilia‘e-Smith o ia o le tamaitai Samoa o loo avea nei ma Miss Tourism Planet Samoa 2012. Oloo faapea ona lagolagoina malosi e le faatonu o le Lavashe Cousture (Tito Schmidt Stowers) o se tasi foi o alo o le atunuu ua logologa foi i ana mamanu ma le suiina o laei o faasamoa moni. O Tito foi oloo ia tuufaatasi laei o le tamaitai o loo tauaveina le pale a le Miss Samoa Ausetalia i le taimi nei.
Ua faamoemoe o le aso 26 o Iuni o le a tuuvaa atu ai le Miss Tourism Planet Samoa o Sophia Pilia‘e-Smith e tauva i le Miss Tourism Planet 2012 Pageant i Greece lea o le a faia i le aso 27.
O le Miss Tourism Planet o Sophia, o le alo e faasino i le faletua ia Jayne Pilia‘e ma le susuga ia Ross Smith.
