O le auga lea o le malaga mai ai i Samoa o le kapeteni talu ai o le au lakapi a tamaita’i Niu Sila le alo o Samoa, o Fiao’o Faamausili ma se tasi o sui tuai o le Olo Peleki a Niu Sila le susuga ia Rodney So’oialo.
O se tasi o taaloga lakapi e tai tutusa lona faatinoina ma le lakapi pa’i lea ua taua o le Quick Rip o lo o avea ai Faamausili ma So’oialo ma amepasa o lea ituaiga o taaloga i Niu Sila, ma ua faaoga ai lenei taaloga o le quick rip ina ia faao’o atu ai le feau taua ile taumafai lea e faaititia gasegase le pipisi e ala lea ile faamalositino.
O le taunuu mai ai o nei alo lauiloa o Samoa ile taaloga o le lakapi, ina ia faatautaia ai ni polokalame tau aoaoga i nisi o aoga laiti ma kolisi maualuluga ile atunuu e faatatau lava ile soifua maloloina.
Taua e le sui komesina o le ofisa o le Amepasa o Niu Sila i Samoa le susuga ia Michael Mailetonga Walsh, e taua tele le feau e pei ona malaga mai ai i laua iinei i Samoa, e le gata ina ia faalauiloa atili ai le taaloga lenei o le quick rip e pei ona sa faatoa tatala ai ona faitotoa i Samoa ile tausaga na tea nei, ae o le silisili o na mea uma, o le faataua lava o le taumafa i meaai paleni ma le soifua maloloina.
O le aoga a Robert Louis School i Lotopa, o le Kolisi o Pesega faatasi ai ma le Apia Primary na mafai ona asia e So’oialo ma Faamausili ma faatino ai ni aoaoga ile taaloga lava o le lakapi ile aso amata o lea polokalame ma faaauau ai i nisi o aoga e le gata o Upolu ae faapea foi le Motu tele o Salafai.
Na faapupula foi e le Pule Sili o le Pacific Sporting Partnership, Tim Gilkison, o lo o ave foi le faa taua a le Malo o Niu Sila ile taumafai ai lea e faaititia gasegase le pipisi poo non-communicable diseases. Saunoa foi Gilkison, o le taaloga masani lava o le lakapi e pei e fiafia iai le itupa o alii ma tamaitai peitai o le taaloga lenei o lo o aumaia ai se aoaoga taua ile itu o le soifua maloloina.
O le aumaia ai o So’oialo ma Faamausili i Samoa, ona o nisi nei o tama fanau a Samoa e tele le amanaia o so latou sao ile itu tau taaloga. Ma e tele foi le avanoa e mafai ona faalogo iai le fanau ona oni sui logologoa ile lalolagi ile taaloga lava o le lakapi. Faaalia foi le agaga fiafia o So’oialo ile maua ai o le avanoa e toe malaga mai ai i Samoa, ma e mafai ona faaogaina ai lenei avanoa e faamalosi au ai ile fanau laiti ile taua tele o le soifua maloloina.
O le taaloga lenei o le quick rip e taua tele mo le itupa o alii faapea foi tamaitai, ma o se amataga lelei foi lea mo le lakapi a le itupa o tamaita’i, e pei ona saunoa ai So’oialo.
Taua foi e le tamaitai o Faamausili, e tele atu le lesona taua o le soifua maloloina ile taaloga lenei ona e le na’o se taaloga ae o lo o aumaia ai ma le feau taua ile faataua ai o le soifua maloloina o le fanau. Saunoa Fiao’o Faamausili, a iai se isi avanoa e mafai ona ia fesoasoani mai ai i ona tagata Samoa, o le taaloga lava o le lakapi. Na ia faafetaia ai le avanoa ua tuuina atu e le quick rip mo ia e malaga mai ai e tufa mai lona tomai i alo ma fanau talavou a lona atunuu.
Na maua ai foi ma le avanoa o Fiao’o Faamausili e faameaalofa atu ai ona seevae lakapi na taalo ai ile taamilosaga o le ipu a le lalolagi ile 2017 mo le Kalapu taalo a Malisi Sagato Iosefo i Lotopa faatasi ai ma lona mitiafu koleni na ia faaogaina i lea taamilosaga tele. O se meaalofa na talisapaia ai e le Peresetene Taalo a Malisi le susuga ia Faimalomatumua Mathew Lemisio.
O le polokalame e pei ona faatautaia ai e Fiao’o Faamausili ma Rodney So’oialo i Samoa nei, na mafai ona faataunuuina ona o le faiga faapaga a le Matagaluega o Aoga, Taaloga ma Aganuu ma le Iuni Lakapi a Samoa.
