O le faatāuaina o le soifua maloloina lelei o le fanau, o se tasi o vaega o loo sili ona faatāua i sailiiliga ma polokalame a nisi o loo nafa ma polokalame faalauiloa tau le soifua maloloina e lē gata i Niu Sila nei ae o Ausetalia foi.
O le aso 29 o le masina talu ai, Mati, sa faalauiloa ai se tasi o resource, e mautinoa o le a telē se aogā mo le galuega a alii ma tamaitai faiaoga, aemaise lava i le a‘oa‘oina o fanau laiti, mai le 8 i le 12 tausaga le matutua, i le tāua tele o le lava o le moe, mo le faatumauina o lo latou soifua maloloina.
O se fesoasoani ua tauala mai le kamupani a le Philips, ua lauiloa i le lalolagi i lana tautua i oloa e tāua i le soifua maloloina ma le soifua lelei o tagata, lea foi ua saunia mai ai lenei tusitusiga mo le faalauteleina o lenei faafitauli o loo tele ina aafia ai tagata uma, peitai o le fesoasoani o loo patino mo le fanauiti.
O se tusitusiga na amata e se tasi o tamaitai e iloga i suesuega i mataupu tau a‘oa‘oga e faatatau i le moe, o Dr Sarah Blunden, mai le Paediatric Sleep Research Fellow i le vaega tutotonu mo suesuega i le moe (Centre for Sleep Research), a le Iunivesite a South Australia, ma le faatonu sili o le Australian Centre for Education in Sleep.
Ua faia e le Philips lenei fesoasoani mo le lalolagi atoa, i le la faiga paaga ma le faalapotopotoga a le World Association of Sleep Medicine, o se vaega o le taumafaiga ina ia unaia le nofouta o tagata i le tāua o le lava lelei o le mālōlō poo le moe i le ola maloloina o soo e tagata soifua i le lalolagi.
Ta‘ua e Dr Geoff Kira, o se tagata suesue i le iunivesite a Aukilani, ua fetaui lenei fesoasoani mo Niu Sila, auā o loo aafia foi i latou i lea lava masaniga e pei ona iai i le tele o isi atunuu, o le fiafia o tagata e ala umi ae lē lava se malologa pe lē lava le moe.
Na ia ta‘ua, “e toatele tagata Niu Sila ua lē o toe lava lelei taimi e momoe ai. E moni i tagata matutua, ae mafai ona latou toe faatulaga se isi taimi e faaatoa ai le taimi lea na lei lava ai le moe, peitai o le faatāua o loo taulai i fanau, ona e telē se aafiaga i o latou mafaufau pe afai o le a tutupu a‘e ma lenei masaniga o le lē lava o le moe a o laiti, i o latou tausaga mu‘amu‘a”.
O lenei tusi fou, e lē gata ina avea ma taiala mo faiaoga ia latou polokalame, ae o loo iai foi isi vaega e faatino ai ni galuega ma fefaasoaai manatu. E iai foi ma se taiala ua faatulaga mo mātua, ina ia faatino ai foi le latou lagolago mo lenei lava mataupu.
O lenei tusitusiga fou, o se vaega o le polokalame a le Philips, le SimplyHealthy@Schools o loo tele ina faaaogā i aoga mo le faaleleia o le soifua maloloina o le fanau.
