O le lalelei o Samoa ua faamalosia i lenei tausaga i le faamanatuina o le Teuila mo le 15 lenei o tausaga. Ae e mālie foi aga a le tau auā na amata lelei lava le vaiaso i le la manaia o le aso ma le afiafi ae faaiu i tuuga fautasi ae to timuga.
E ui i lea na manino lava le tele o le lagolago i taumafaiga a le Pulega o Tagata Tafafao Maimoa mai i fafo, e pei ona vaaia ai le tumutumu atu o le atunuu faapea turisi i faaaliga i le Eleele Fou e pei ona iai i faleie ua faatau ai lavalava ua saunia lava i Samoa ma ua unai ai le tomai eseese ua iai i mamanu o elei.
O fale lalaga a tina ma tamaitai mai i komiti a tina i vaega eseese o le atunuu, ua faalauiloa a latou galuega taulima e pei o le iniini i le Ie o le Malo atoa ai ma le siapo.
O se tasi o fale e vaaia lava le tumutumu i ai o tagata o le fale na faatautaia ai taga-tatau.
O le vaiaso o le Teuila na faalauiloa ai le faaiuga o tatau a nisi na galulue ai tufuga ta-tatau.
E lē gata i lea na toatele foi i latou na maua le avanoa e a‘oa‘oina ai i le tomai o le vaneina o laau atoa ai ma le gaosiga o galuega taulima anagata e pei o vaa, tanoa palu ‘ava ma isi meateufale ua gaosia uma lava i Samoa nei.
O taaloga e pei o le kirikiti, le lakapi atoa ai ma taaloga Samoa e pei o le taulafoga, na faatautaia uma lava i afioaga ma le taulaga o Apia.
Ae e ui i timuga ma le sou o le sami na vaaia lava le tumutumu o taligalu o le taulaga o Apia ia i latou na faatalia le agai ane o le tuuga fautasi lea na taualuga ai foi fiafiaga ma taaloga o le Teuila i lenei tausaga.
O le sailiga o le Tausala na amata mai lava i le Aso Gfafua ua tea ona faalauiloa ma tatala le avanoa o le atunuu e palota mai ai i Tausala o le atunuu.
E ese lenei tausaga ona ua na o le toaono tamaitai na tauva.
Ua lē toe tauva se sui mai i Amerika ma e lei iai se tala ua aumai i le Pulega o Tagata Tafafao mai i Fafo ae ua masalomia faafitauli i le tausala o Samoa mai i Amerika lea na faamavae i le tausaga na tea nei, atonu o le mafuaaga lea o le lē toe iai o se tamaitai mai i Amerika e toe tauva i lenei tausaga.
O le faaletonu o le nofoaga na faamautu ai lenei tamaitai ma le fesiligia o ia i le faamaoniga o ia o se Samoa ae ua mae‘a ona pale mai i le Tausala o le atunuu lea na tulai mai ai loa feeseeseaiga ma faapea ai loa ona faamavae le tamaitai sa tulai mai i le tofi o le Tausala o Samoa.
O le tausaga lenei e na o le Tausala Samoa mai Niu Sila ma le Tausala Samoa mai Ausetalia ia na tausinio i le sailiga o se tausala o le atunuu.
O le isi vaega tāua o lenei Faaaliga ua vaaia ai le malosi o tauvaga mo le tomai o le sula toga i tamaitai ma le tauvaga lauga ma le folafola ava i alii.
O le vaitau lenei o le tausaga sa aupito laititi ai le numera o tagata tafafao mai Samoa ma o le mafuaaga lea na a‘e ai se manatu i le Pulega o Tagata Tafafao Mai e faatautaia se faaaliga ina ia faatosina mai ai tagata tafafao mai i Samoa.
O se faiga ua manino le faamanuiaina ai o le atina‘e lenei i Samoa ae ua toatele ai foi tagata Samoa mai i atunuu mamao ua malaga mai e faafiafia, tauva i taaloga ma tafafao mai i Samoa i lenei taimi o le tausaga.
O le tausaga muamua lenei ua se‘i ese ai le Siamupini o Faagatama i le Tai lea ua sola ai ma le Fetu o le Moana I.
O le fa tausaga talu ai na mau ai i le Digicel Segavao lenei tausinioga ma e ui i le sou o le sami i le Aso Faraile ma le timu, ae na malosi lava le tuuga ma na molimauina foi le televave o le tuuga.
E oo mai i le tolotolo i Mulinuu ua tauva mai le Fetu o le Moana I mai Manono, o le Digicel Segavao a le Ekalesia Katoliko i Siusega ma ua aloina e tama o le aoga a le Don Bosco, atoa ai ma le Tavaesina mai Manono foi. O le faaiuga lava lea o le tuuga.
O le sa o le Fetu o le Moana II mai Manono na tulaga fa, tulaga lima ai le sa fou a le afioaga o Magiagi, le Lupe o le So‘aga, tulaga ono le sa o le afioaga o Lepea o le La o Samoa, tulaga fitu ai le sa o le afioaga o Vailele o le Little Rina.
O le tulaga valu na maua lea e le sa o le afioaga o Vaiala o le Ulalei Bluebird, tulaga iva ai le isi sa o le afioaga o Vailele o le Punialavaa, ma le sa fou foi o le afioaga o Leauvaa, le Teine o le Lava lea na tulaga 10.
O nisi o aufaafiafia i afiafi na aofia ai le ausiva mai Amerika Samoa, le Taupou o Tane mai i Amerika Samoa lea foi ua faia ana faaaliga i Samoa a o lei toe foi atu i Amerika Samoa.
