O le ietoga sae tosi ninii a Samoa poo le ie Samoa mao‘i lea e anagata ma faigata ona lalaga e alu se fia tausaga o saofai ai se tina ma lalaga, ua toe faaolaola pea e le Malo i lana polokalame o le ie Samoa, ae ua lagolagoina e le faalapotopotoga a Tina Faipisinisi a Samoa, le Samoa Women in Business.
O le faamoemoe o le faalapotopotoga lea i le unai o tina o falelalaga e lalaga le iesae Samoa tosi ninii, ua aumai ai ma se valaaulia mai se falemataaga o le atunuu o Iapani e avatu le ie lea a le atunuu e faalauiloa ai. O le faamatalaga mai le faalapotopotoga e faapea o le a faalauiloa le ie a le atunuu i se taumafaiga e faatāua ai ma le falemataaga o Iapani e faapitoa lava i measina a atunuu e tāua ma anagata.
O se avanoa lelei lea o le a silasila ai foi tagata o isi atunuu i lea vaega tāua o tu ma aganuu a Samoa e pei ona faaalia e le faalapotopotoga i se pepa o faamatalaga.
Na faatau e le faalapotopotoga i Iapani se ie Samoa tosi ninii e ala i le faalapotopotoga o tina faipisinisi ma latou ave e fai ma suvania, ae peitai o lea ua mananao nei le faalapotopotoga i Iapani e ave e faalauiloa i le falemataaga ona ua latou iloa nei le tāua o lea measina a lo tatou atunuu.
O se fiafiaga lea i le faalapotopotoga a tina faipinisi a le atunuu ona o le latou fesootaiga na fatau ai le ie, ae o lea ua oo i se isi tulaga sili ona tāua.
O le iesae na faatau sa lalagaina e le tina o Apiseka Falefa ua faalima ona manumalo ana ie e ave i le faalelegapepe tele a tina o le atunuu lea o loo lagolagoina e le polokalame a le malo o le toe lalagaina o le ie Samoa. Fai mai o se iesae e lē gata ina ninii ae e sae foi le laufala o loo lalaga ai.
Ua tele tausaga o lagolago le faalapotopotoga a tina faipisinisi a le atunuu i le polokalame a le malo o le toe lalagaina o le ie Samoa mao‘i ma ua toatele ai foi tina o le atunuu ua selesele i le lo latou tautiga.
O loo faatau mai e le atunuu le tele o nei ie Samoa mai tina o loo galulue ma tina faipisinisi ma ua maua ai se alagatupe e fesoasoani i tina o loo feagai ma le galuega.
O le molimau foi lea a nisi o tina o loo lalagaina le iesae Samoa mao‘i ona ua mafai e seleni ua maua ona fesoasoani ia latou galuegafai i totonu o aiga nuu ma ekalesaia.
O nisi o tina ua maua nai faaopoopoga o le atinae o aiga ona o seleni mai le lalagaina o le ie Samoa.
