E faataunuu i le masina o Tesema i tausaga uma le polokalame o fiafia ma siva a atunuu eseese a le City Council poo le itumalo o Broadmeadows i le aai o Melepone.
O le tele lava o ē faafiafia o aoga, faalapotopotoga ma Ekalesia, peitai o lenei tausaga ua faaigoaina le polokalame o le “Lets Connect”, ma na faafiafiaina le aoga tulagalua a Meadows ina ua valaaulia i latou e fai ma sui e faatinoina siva ma fiafia faa-Samoa.
Na saunoa le tamaitai faiaoga ia Maria Tuua, o se avanoa matagofie ma le lelei tele lenei, e faalautele ai pea le faatāuaina o a tatou tu ma agaifanua, aemaise lava o a tatou aga o faafiafiaga ma siva faa-Samoa i totonu o aoga o loo aoaoina ai tama fanau a le atunuu.
Na amataina la latou faafiafiaga i le faatuaao i le sāsā, sosoo ai ma le siva faitaga, faatino ai ma le siva a la tatou Manu Samoa, ae faaiu i le mauluulu, a o agiagia le tagavai o Samoa i tua atu e faamalumalu i nai alo ma fanau a o faatino a latou siva.
E silia ma le afe limaselau 1,500 le mamalu o tagatānuu eseese na maimoa ma molimauina le faamoemoe o le City Council.
E momoli ai le faafetai tele i nai alo ma fanau na tauaveina le igoa o Samoa, aemaise foi o nai mātua na fesoasoani atu, faapea foi le vasega o faiaoga.
Talosia ia aveave ai pea le fiafia o nai nei alo ma fanau e sisiva mo Samoa.
