O se tulaga faafiafiaina i matua pe a ‘ae manuia taumafaiga a alo ma fanau i soo se vaega o le olaga e faamanuiaina ai.
O le sini lea ma le autu, o le tuufaatasia ma le faatauāina e le Radio Samoa o taleni a le fanau iti, auā a lelei le atina’eina a’o laiti i latou, e lē mafai ona sese upu a le Tusi Paia, e le toe te’a ese ai.
O le tolu ‘ai nei o vaiaso o faagasolo se tauvaga pese i luga o le alaleo a le Radio Samoa 1593AM mo tamaiti, i le polokalame afiafi lea na faamaea i le Aso Faraile na te’a nei.
E silia i le lua sefulu sui na auai i le tauvaga, peitai na’o le toaono na sao i le sailiga siamupini, e fua lava i le palota ma le faamasino a le atunuu i luga o le alaleo. E maofa foi le ‘au faafofoga ma le ‘au fai polokalame i le talenia o fanau o loo faameaalofaina ai e le Atua.
E maofa i siufofoga o tamaiti, mai lava ia i latou na’o le ta’i lima tausaga, i le sefulu lua tausaga.
O le lelei ma le matala o le tautala i le Gagana Samoa aemaise le faaleoina o upu, e matagofie i le faafofoga. Le fegauaiga o siufofoga ma le sa’o lelei o le usuina o fati o pese, o nisi na o vaega sa fua iai le palota ma le faamasino a le ‘au faalogologo.
E ui na utiuti le taimi e faatinoina ai le polokalame, peitai e le tuu itiitia ai le taupati atu o valaau a le fanau e fia auai.
E toaono i latou na saili iai se tama pese ma se teine pese o le tauvaga, to’alima tamaitai, ma le alii e toatasi, lea na sola ai le alii o Makarios sefulu lua tausaga, ma le manumalo ina ua palota ma tusi aao iai le toatele o le au faafofoga.
O le tamaitai o Amelia valu tausaga mai Mt Roskill sa mauaina le tulaga lua, tulaga tolu o Hannah mai Henderson o le tamaitai pito i laititi foi lea na sao i le sailiga siamupini e ono tausaga.
O le tamaitai o Georgina iva Tausaga mai Otahuhu i le tulaga fa, Daisy mai Mangere i le tulaga lima ma le tulaga ono o le tamaitai o Pina.
O le Aso Toonai na tea nei, na tauaaoina ai faailoga mo tamaiti, auala mai i le lagolagosua o kamupani o le Manea Music, ETV Production, Vision Recording ma le Ailao Naifi Dance Group.
O le faafetai ma le faamalo e momoli i matua o fanau na auai ona o le latou lagolagosua ma le soosoo tauau, ua faaiuina ai ma le fiafia le faamoemoe faapea ma le mamalu o le atunuu na palota ma faamasinoina le tauvaga.
O le naunautaiga o le polokalame ia avea le Radio Samoa ma avanoa e tatala atu, e faalauiloa ma atina’e ai taleni a le fanau mo le lumanai.
E toe mafai foi ona toe tuufaatasia se isi tauvaga pese mo le fanau, i se isi taimi o lumanai.
