Matagaluega Ofisa fuimu

O le toatele o alo ma tama fanau o le atunuu o Samoa aemaise nisi o tama fanau o le Pasifika o loo galulue i totonu o le matagaluega ile matagaluega o Fuimu i totonu o Niu Sila aemaise lava ia Aukilani o loo taumafai ai nei alo o le Pasifika e momoli pea le feau soosoo tautau ma le mafutaga fanafana o le faatauaina lea o tu ma aganuu a le Pasefika i totonu o matagaluega o loo galulue ai i atunuu i fafo. O le naunautaiga o tama fanau o Samoa ia taumafai lava ia faatauina pea aganuu i nofoaga ma mea o loo galulue ai. O tu ma aganuu a atunuu o le Pasifika o measina ia a atunuu o loo faamemelo pea ia ia aua nei mamulu pe galo atu foi.

O le matagaluega o le fuimu e toatele nisi o alo o Samoa o loo galulue ai, o tausaga taitasi e masani ai foi ona latou faatauaina aganuu a Samoa ma lana gagana, ae o le tausaga lenei ua mafai ai ona latou faatinoina faapitoa se polokalame e faataua lelei ai le aganuu a Samoa i totonu o le matagaluega. O le aso Faraile o le vaiaso ua mavae sa faataunuuina ai lea faamoemoe i le ofisa o le fuimu i le city i Aukilani, sa faapea ona auai atu ai le afioga i le sea o le sinoti a Aukilani i Matu ia Rev Taumafai Komiti o ia foi lea sa tatalaina le polokame i le sauniga lotu faatasi ai ma le pule autalavou ia Rev Ioane Leilua, e molimauina le sao o le ofisa o Fuimu i le faatauaina o le aganuu a Samoa.

  I le saunoaga a le taitai o le sauniga ia Rev Taumafai Komiti na faamalosi lava i le soifua galulue o alo ma tama fanau o le Pasifika o loo galulue i totonu o le matagaluega o le Fuimu i le tautuaina o tagata lautele. Ia e alofa i ou tuaoi, ia alofa foi oe ia te oe, aua e faatusatusa faapena le galuega a le Fuimu o loo faatino i le atunuu, o le alolofa lea i tuaoi pe oo ina tupu mai se faalavelave ae ia mafai foi ona toe laveai e latou latou lava i taimi o faalavelave e ono tulai mai. Sa faapea foi ona auai le faauluuluga o le matagaluega o le Fuimu faapea ma nisi o ituaiga o le Pasifika o loo galulue i totonu o le matagaluega, sa faatasi atu ai foi nisi o sui o le matagalauega a leoleo faapea sui mai le Ambulance, ma o le matagofie lea o le faamoemoe ona sa molimauina e vaega eseese o le matagaluega aemaise o le Pasifika atoa.

Sui o le Matagaluega o le Ofisa Fuimu

Na maea le sauniga lotu ona pati loa lea o le ava, e faafeiloai ai le mamalu o le auvalaaulia faapea uo ma e masani sa agai atu. 

O le susuga ia Mauola Vaeono sa gafa ma le taumafaiina o le ava faatasi ai ma nisi o alo ma tama fanau a Samoa o loo iai i le matagaluega, na maea lea ona sosoo ai lea ma le taumafataga, na o taumafa Samoa lava sa iai, ae mulimuli ai loa ona tauaaoina atu le latou meaalofa Samoa o le tanoa, fue ma le tootoo mo le faauluuluga o le matagaluega a le Fuimu e tali masineia ai le faamoemoe o le faatauaina o le aganuu Samoa i totonu o le matagaluega. 

O le taimi muamua lea ua aloaia ai se polokalame faapea i totonu o le Fuimu, ma ua iai foi le faamoemoe o alo ma fanau Samoa e faaauaau pea i tausaga taitasi lenei polokalame ina ia aua nei tuua i lalo le faatauaina o le aganuu a Samoa i totonu o le matagaluega.