Faatāua e le Mafutaga “Tatalo mo Isaraelu” le Aso Sa o Tamā

O le tele o Ekalesia taitasi na faia a latou mafutaga ma o latou tamā i le faaiuga o le vaiaso, e faamanatu ai le Aso Sa ua faapitoa mo latou. Sa tele ina faataunuuina i totonu o faleaiga (dinner) poo totonu foi o ekalesia lava latou. Ae ese mai ai la lenei mafutaga o le Tatalo mo Isaraelu (Prayer for Israel), sa faataunuuina le latou faamanatuina o le Aso Sa o Tamā i se tasi o hall i Magele i le po o le Aso Toonai.

Sa amata i le viiga o le Atua le polokalame na taitaia lea e le tina ia Sheila, ona sosoo ai lea ma le faamalosi i le upu a le Atua na fofogaina e le susuga i le taitai o le mafutaga ia Ben Taala. Na saunoa faaopoopo foi lona faletua ia Maria Schmidt Taala i le upu lava a le Atua i tamā uma faapea le mafutaga atoa.

O le luitau ma le toe fafagu i tamā, “E lē vaai le Atua i lou tuanai, ae vaai i lou loto.” O tina ma fanau na latou tapenaina meaalofa ma ula mo tamā. Na tulai lava le tina ma lana fanau e fai le latou molimau e uiga i le mafutaga ma si ana tautoga.
O se po fiafia ma le mālie i tautinoga a tina na faaalia, e pei ua toe fafagu mai ai le taimi faatoa tuufaatasia ai i le sakarameta o le faaipoipoga. O le tasi lea lagona o le po sa iai o le tutufaatasi o mātua ma fanau, ma le alofa faale-Atua o loo fusia ai le aiga.

Na saunia foi e tamā faapea nisi o fanau aitema e faamaualuga ai pea le viiga o le Atua ona o le aso faapitoa mo tamā. Sa faamanatuina ai foi i lea po le aso soifua o se tasi o tina ia Samoa ua atoa i ai lona 40 tausaga, ma faaiu ai loa i se taumafataga lea na saunia lava e tina ma fanau.
O lenei mafutaga, o tagata taitasi mai i Ekalesia eseese, ua mafai ona ofoina o latou soifua e auauna ai mo le nuu filifilia o le Atua.

O le latou matafaioi, o le tatalo lea mo le nuu o Isaraelu, faatasi ai ma le tapueina o agaga ma olaga o aiga ma fanau o loo manaomia le faaolataga a le Atua, ae o loo tatalo foi mo Samoa ma le lalolagi atoa faapea fata faitaulaga e fia o loo alagaina le upu a le Atua.

O le susuga ia Ben Taala ma lona faletua ia Maria Schmidt Taala, o i laua ia na faavaeina mai le galuega i Smaoa ma toe faatuina le isi galuega i Niu Sila nei. O Aso Toonai taitasi uma lava o loo faatinoina ai lenei mafutaga i le hall a Rarotonga i Magele.

O le tausaga e 1995 na faavae ai le mafutaga tatalo mo Isaraelu i Samoa, ae o le tausaga e 2004 na faatuina ai le mafutaga i Niu Sila nei ina ua sui foi le valaau a le Atua i lenei atunuu e aumau ai.

E le atoa se toasefulu o i latou na faavaeina lenei mafutaga, ae o le taimi nei ua silia i le 60 tamā ma tina faapea fanau ua auai, ma o le mafuaaga foi lena ua see ai i le hall e faatino ai ona ua tupu ma ola le galuega.
Mafutaga tatalo o le Prayer for Israel

Nisi o Tama o le mafutaga na saunia aitema i le faatauaina o le aso sa o tama

Susuga i le taitai ia Ben Taala ma le faletua ia Maria Sshmidt Taala ma le nofo a alo