Faatāua e le Ekalesia Gateway Assembly of God (GIM) Polokalame o le Aganuu Samoa

O le faamuamua o le ola faaleagaga ma le faatāuaina o le aganuu Samoa e soo se talavou o loo ola ma soifua ane i totonu o Niu Sila nei, o le auga tonu lea o le faamoemoe a le Ekalesia Gateway Assembly of God i Mangere East i le Aso Sa na tuanai atu nei.
O le toatele o alo ma fanau a le ekalesia, o i latou na fananau i Niu Sila, ma e itiiti se iloa i le faatinoga o le aganuu Samoa i ona vaega eseese, faapea le faatāuaina o le unaia pea o le tautala i le gagana Samoa ina ia lelei ma atoatoa, auā e aogā tele lea i totonu o meafai a le Ekalesia.
O le faamoemoe na talafeauga tonu tapenaga a le autalavou ma le faamanatuina o le vaiaso o le tatou gagana Samoa. Lua masina talu ai, na amata ai ona tuufaatasi lenei faamoemoe, e aoaoina ai tu ma aga faasamoa moni, seia oo lava ina faatinoina le latou polokalame i le Aso Sa na se‘i mavae atu nei.
O mātua lava ma aiga lotu o le ekalesia na nafa ma le a‘oa‘oina o le fanau i tulaga masani o le aganuu, e pei o le paluina o le ‘ava, le faasoa ‘ava, o tautalaga faasamoa faapea siva ma pese.
O se suiga fou lea na iai le sauniga lotu a le Ekalesia, ina ua faatinoina le sauniga atoa i le Gagana Samoa, faaaogāina le tupulaga talavou e taitaia le sauniga, faitauina le afioga a le Atua, tatalo, ae faaiu ia latou pese ma siva faasamoa, liliuina i le faaaogāina o pese faaleagaga e viia ai le Atua.
O se faamoemoe lava tapena i itu uma na alo i ai le autalavou, i le maopoopo o le latou togiga faapea le saunia o taumafa Samoa na faamae‘a ai le polokalame matagofie i le Aso Sa. O le taitai o le autalavou o Jonathan Morisa, faapea ma sui o le komiti faafoe, Rachel Alapati, Timo Morisa, Mercy Su‘a ma Louis Magalogo.
O le GIM o loo taitai e le susuga i le faafeagaiga Ps. Galumalemana Veni Morisa ma le faletua ia Annie Morisa. O le faamoemoe ia le uma ai ii le aoaoina pea o tupulaga talavou a le GIM i le aganuu Samoa, ae o le naunautaiga ia faaauauina pea le ola a‘oa‘oina e faatāua le ola faaleagaga ma le aganuu Samoa.