Ua lua tausaga o faatautaia faailoga taualoa e faafetaia ai le auaunaga faafaiaoga i Samoa.
O se taumafaiga ua unaia e le Matagaluega o Aoga, Taaloga ma Aganuu ona o le manatu ua tatau ona iai se auala e faafoi atu ai le faafetai i nisi o faiaoga e maoa‘e ese lava le latou foi auaunaga.
I le sauniga faapitoa la mo le tauaaoina o faailoga taualoa nei, na saunoa ai Mataia Piki Galuvao, o se tamaitai asiasi aoga mālōlō manumalo i upu autu ma faamalosiau ai e lē gata ia i latou ua faamanuiaina ae mo faiaoga uma o le atunuu.
Na faamamafa e Mataia le autu o le aso o faiaoga sa faapea ona faamanatu foi i le vaiaso na tea nei i le maua o avanoa tutusa mo tagata uma ma ia leai se faailoga tagata i tamaitai faapea alii.
Na ia saunoa foi, ia tutusa le vaai ma le faatinoga o le auaunaga i tamaiti uma ma e faapea foi ona lē faaituau. O ni avanoa e seāseā maua ma o se polokalame fou foi na amata mai i le tausaga na tea nei e faau‘u ai faiaoga i le faailoga taualoa mo le agai i luma o le faatinoga o le galuega.
E tolu ni laasaga o le filifilia o faiaoga mo lea faailoga. Muamua, o tausaga galue, e lē tatau ona i lalo ifo o le lima tausaga le auaunaga faafaiaoga. Lona lua, o se tagata faigaluega faafaiaoga tumau, e lē aofia ai i latou o loo galulue faavaitaimi.
Ma le lona tolu, o le lelei ma le maoa‘e o ona uiga faataitai i le maualuga o ana galuega e lē gata i totonu o le Matagaluega o Aoga ae o lana tautua i totonu o potu aoga i le aoaoina o le fanau.
Sa toatele lava na iai faagaulemalie i le filifiliga o faiaoga o le tausaga e pei ona faaigoa ai nei faailoga taualoa, ae o le faamalamalamaga o le filifiliga o i latou e maua nei faailoga e amata mai lava i totonu o le aoga. A lē faaulufaleina foi la le suafa o le faiaoga i lenei tauvaga e lē aofia lava la i totonu o lenei faamoemoe.
O le faailoga lenei e mafai ona maua ai faamanuiaga e pei o ponesi mo faiaoga. E tuu lava le avanoa i aoga uma e filifili mai ai faiaoga ua maualuga le latou auaunaga i totonu o aoga, ma o suafa foi e tuu mai i le laasaga muamua e ala mai i pule aoga ma asiasi aoga o Itumalo e faia i ai le filifiliga mulimuli a le komiti a le Matagaluega.
O le tausaga na tea nei e to‘a 19 sa faamanuiaina ai ae mo le tausaga lenei e toaiva ua filifilia ai i le tulaga i la latou tautua mo le aoaoina o le fanau.
O nei faailoga taualoa o se vaega o le aso ua faamanatu ma faafetaia ai le auaunaga faafaiaoga. O le tele o aoga sa fai meaalofa fanau aoga i o latou faiaoga, e ala i ula lole, o seleni, o fasimoli taele ma pauta tamea.
O isi faiaoga na fai lava a latou aso taalo mo faiaoga ma fai tauvaga siva – o ni fiafia ua faatautaia auā lava le faafetaia ai o faiaoga o le atunuu.
O se tasi lenei o Asosi aupito toatele i totonu o le atunuu ma o loo faaauau faasalalauga i le moomia pea o faiaoga i Samoa. O le tele foi o tama ma teine ua faauu mai ma faailoga i aoaoga, ua agai i isi matagaluega o le malo ma kamupani tuma‘oti ona o loo faaauau ona finauina totogi o faiaoga.
O ni mataupu nei o loo lagalagā pea ae o aso faapitoa nei, ua faatautaia ina ia iai se tali atu i lenei auaunaga tāua ma o se aso ua faafetai ai tama ma teine aoga, aemaise o le atunuu loaloa i faiaoga o Samoa.
O i latou la nei ua faau‘u ai i faailoga taualoa nei:
Aigalotu Poasa Esera – Kolisi a Faleata (Upolu)
Tiatai Salefao – Kolisi a Lepa ma Lotofaga (Upolu)
Fili Elia – Aoga Tulagalua Salailua
(Savaii Sisifo, Upolu)
Solomona Ga‘olepo‘a – Aoga Faaitumalo a Falealili (Upolu)
Sa‘o Tolai – Aoga Tulagalua Satuimalufilufi (Aana # 2, Upolu)
Tuiono Faaui – Aoga Tulagalua Vaisala (Asau # 1, Savaii).
Fono Selulo – Aoga Tulagalua Samauga (Itu-o-Tane # 2, Savaii)
Tainoino Vili – Aoga Tulagalua Salelologa (Faasaleleaga # 1, Savaii)
Eve Uea Peniamina – Aoga Tulagalua a le Laumoli (Itu-o-Tane # 1, Savaii)
