Faatau e le Malo Samoa kamupani vaa PFL

O le amataga o le vaiaso nei e tatau ona faamautu ai le faatauina e le Malo o Samoa o le selau pasene o sea o le kamupani vaa a le Pasefika le Pacific Forum Line le PFL. E tuuina atu lenei lipoti mo le faasalalauina, e lei faamautu mai se faamatalaga i le Malo o Samoa pe fia le tau atoa o le kamupani vaa.

O se finagalo o le Sui palemia, le tofa Fonotoe Nuafesili Pierre Lauofo, o loo ia faaalia ai o le faatauina e Samoa o lea aseta tāua ona o le vaai mamao i le tulaga o le sologa lelei o le felauaiaina o oloa ma uta i le va o atunuu o le Pasefika.

Sa iai popolega i le maualuluga o ni tau o le a felauai ai oloa pe ana faapea e faatau e le kamupani vaa o le Sofrana lea sa tuuina atu foi lana ofo mo le faatauina o le PFL. Peitai o loo faaalia e se sui o le Sofrana e leai se latou ofo na ave.

O le faaiuga o le vaiaso ua mavae na faailoa ai se finagalo o le afioga i le Palemia, Susuga Tuilaepa Lupesoliai Sailele Malielegaoi, i le tulaga ua oo i ai galuega a le Malo i le faatauina o le PFL.

Saunoa Tuilaepa o se tasi lea o meatotino tāua a atunuu laiti e 12 o le Pasefika na latou faavaeina le PFL ona sa naunau e faia ni tau talafeagai mo vaa e felauaiina oloa ina ia gafatia e atunuu laiti.

O le mafuaaga foi lea o le naunau o le tatou Malo e umia le kamupani vaa ina ia faaauau ai pea lea faamāmā avega, ma le itu tāua ia lē motusia le feaveaiina o oloa manaomia i atunuu o le Pasefika.

Na toe faamanatu ai e le Palemia i le vaitau o le 1970 sa taugata ai vaa la‘uoloa sa la‘uina uta, ma sa lē gafatia e le tele o atunuu laiti ma afaina ai o latou tamaoaiga, aemaise lava i le lē maua o oloa manaomia ona ua leai ni vaa e mafua i le lē gafatia e atunuu ona totogi.

I se talanoaga ma le taitaifono o le Komiti galulue poo le Taskforce Committee a le kamupani vaa o Samoa le Samoa Shipping Services, le afioga ia Tupuola Oloialii Koki Tuala, na ia faaalia ai o le tasi lava itu tāua o le faatauina e Samoa o le PFL, o le maua ai pea o avanoa faigaluega o alo ma tamafanau a le atunuu o loo galulue i luga o vaa lauoloa tetele.

O se tasi lea o taumafaiga a le malo i le faafaigaluegaina o alii vaa poo seila mai Samoa i luga o vaa tetele, e pei ona galulue nisi i luga o vaa o le PFL e pei o le Forum Samoa le vaa lauoloa o loo umia foi e lo tatou malo ma le atunuu.

O le vaa lea ua leva ona faasalalau le faatauina ese peitai na faaalia e Tupuola, o loo faasalalau pea i le maketi pe iai se atunuu ma se kamupani e faatauina ae o le a toe silasila i ai le pulega fou o le PFL ma le Malo o Samoa pe o le a toe aumai le Forum Samoa e faaaogā mo le la‘uina o uta pe a mae‘a tapenaga o le umia e Samoa o le PFL.