E lē galo i le taatele o le au matutua le falepopo o le kamupani a BP sa faafesagai ma le maketi i Savalalo ao iai lea kamupani tele i Samoa.
O le fanua sa iai le falepopo sa lisi mai i le ekalesia Katoliko i Samoa, lea na muta loa pisinisi a BP i le atunuu see atu le kamupani faatau taavale o le Toyota mai Iapani lea ua suia le igoa i le Asco Motors ma faaauau le lisiina o le eleele e oo mai i le taimi nei.
Peitai ua iai nei se faaiuga a le ekalesia e faatau le fanua e silia ma le kuata eka o se fanua ei le vaega pisi o pisinisi ma faatauga i le taulaga.
Ua faaalia e le sui sooupu o le ekalesia Katoliko le afioga Patele Penitito Mauga, i se lipoti ua tolu nei vaiaso talu ona faasalalau e le ekalesia le faatau ese atu o lea fanua ona o nisi o fuafuaga mo atina‘e a le ekalesia o loo manaomia ai se seleni. Faaalia e le sooupu e $8 miliona le tau o loo faatau ai.
O le tasi lea o ekalesia pito tele ona fanua aemaise o le tele o eleele i le taulaga e umia e le Katoliko mai lava i le talafatai o le taulaga e oo i se vaega o le mauga o Vaea faasolo atu i fanua o loo i Moamoa.
E le gata i ia fanua e tele ae faapea foi le tele o eleele o le ekalesia i nuu ma itumalo eseese o le atunuu o loo iai ona aulotu.
O nisi o fanua o le Katoliko i le taulaga ua faatau ma umia e nisi o aiga ma pisinisi.