Na aofia potopoto alo ma fanau ma le mamalu o le aiga o Fuimaono Amituanai mai Samoa, Ausetalia ma isi atunuu mamao, faapea foi ma Niu Sila, i le aai o Aukilani o loo alaala ma afifio ai nisi o lo latou aiga, e patipatia ma faamanatu faatasi le afio mai o le pepe o le Kirisimasi, aemaise o le faataunuuina ai o la latou mafutaga tuufatasi e pei ona masani ai i le tailua o tausaga.
O le agaga ma le finagalo autu o le paia ma le mamalu o le aiga, ia faamasani ma faafealofani alo ma fanau lalovaoa a le aiga, aua ua tupu ma olaola le aiga i faamanuiaga mai le Atua e ala i alo ma fanau, ae le gata i lea, ua faamanuia foi le Tapaau sili e ala i le sailimalo ai o lupe faalele a le aiga le susu i faafeagaiga taulagi i atunuu i fafo, ae tainane le lautele o tamafanau a le aiga ua faamanuiaina i atunuu mamao.
O le tasi o finagalo e pei ona masani ai lo tatou atunuu, o le tuu taliga atu pea i augatupulaga fou, o tala faasolopito ma measina faa le aiga, aemaise o le gafa faa le atunuu ma le afioaga na soifua ma tupuga mai ai tuaa ma augatama o le aiga, atoa foi ma le limataitaina i le soifuaga faa Samoa moni e ala i tu ma agaifanua e maua ai le ava fatafata, o le malosiaga lea mo le fealofani ma le galulue faatasi mo le lumanai.
Na tatala aloaia le faamoemoe tele o le aiga alii i le sauniga lotu na taitaia e le susuga i le faafeaiga ia Rev Eteloma Kuki o le Ekalesia EFKS a East Tamaki i se tasi o malu i Magele, ona alo ai lea i le mafutaga mo aso e fa, ae na faai’u i le tafaoga se’i maimoa ma silasila sui mai isi atunuu i le lalelei o Aukilani, ma faamatafi ai i le sauniga lotu na saunia e se tasi o lupe faalele a le aiga, le susuga i le faafeagaiga ia Aliiaunoa Fagaloa o loo galue i le VOC i Melepone Ausetalia, ma taape fiafia ai le mafutaga ma le viiga o le Atua silisiliese ua maualuga. Tatou feiloai i Melepone i le 2014
