Faatasiga a le aiga o Futi Talifa‘aifo

O le Aso Sa na mavae atu nei sa faapea ona faia ai le Aperila masani i suli tau i Futi Talifa‘aifo i Faleu Manono. Ua atoa nei le 31 tausaga talu ona faamanatu le Aperila i Niu Sila nei. Na amataina lenei lotu faamanatu i le 5.30am i le vaveao o le Aso Sa. Na taitaia e le susuga i le tausi matagaluega i Otara o Salafai Mika lenei sauniga i le Malumalu o le Ekalesia Metotisi Samoa i Otara. Sa faapena foi ona toe taitaia e le susuga i le tausi matagaluega le tatalaina aloaia o le anapogi o le aiga Futi Talifa‘aifo. Ina ua uma ona tatalaina le anapogi sa faapea ona gasolo le aiga i le laoa o le Tina Malolo Manumalo o Vaaiga Pati Toso aua le tapenaina o le toonai. Sa faatumulia i suli o Futi Talifa‘aifo i Niu Sila faapea foi nai loomatutua ma nai toeaiina o le aiga. O loo tausia e le Tofa ia Telea Fiu Tali ma le tofa ia Talifa‘aifo Fa‘ifa‘i Salesa lenei mafutaga, a o le failautusi o lenei aiga o le tofa ia Talifa‘aifo Luapule Taupa‘u. O se vaaiga na o le ata o le lotu faamanatu a le aiga Futi Talifa‘aifo. Ia ua mavae atu lenei tausaga 2009, ae o loo alo atu mo le lotu faamanatu o suli tau i Futi Talifa‘aifo i Faleu Manono mo le tausaga e 2010.