Eliza Su‘a-Hunt & ETV Production
O le ata tifaga o le Silamanino, ua molimauina e le toatele, o se ata matagofie tele, ma e lei taumateina le matuā faamalieina o le silasila ma le maimoa a le atunuu, sa uluai silasila i lona uluai faalauiloaina i le Aso Lulu, aso 23 Me, i le vaiaso talu ai.
E tele molimau ma tautinoga a nisi sa auai i lea po, sa tau faamatala ai le matagofie tele o le ata ma lona tapenaina.
Ona o le tala o loo faaautu ma taulai i ai vaega e lima ua faatulagaina o lenei ata, faapea i latou o loo faagaioia vaaiga taitasi, atoa ai ma le faaaogaina o le gagana Samoa, ma ona faatinoga.
O vaega uma ia sa fai ma pogai o le faamalieina o manaoga i le maimoaina o le ata. Ua lava ia e fai ma faatosina, mo le toatele ua sauni ma faatalitali atu i le taimi o le a maua ai DVDs o le Silamanino, e pei ona vavao ai lenei vaitaimi.
O le ata ua faaigoaina ia Silamanino, ae o le suafa lea o le tina Samoa lava o Silamanino, a o lona toalua poo le tamā o le aiga o Fogavai Ki.
O le tamaitai lalelei o Verona Parker, o loo faatinoina le tele o vaega tāua o le vaaiga muamua o le ata e pei ona le o toe mamao ona maimoaina loa lea e le lautele.
Pei ona silafia, o le tamaitai o Verona, sa tulai mai le tofi o le Miss Samoa i le tausaga e 1996 i le 1997, ma o ia foi le uluai Miss Samoa na manumaloina le pale o le Miss South Pacific poo le Lalelei o le Pasefika i Saute i lena lava tausaga.
Ma o le molimau a i latou na uluai maimoaina le tatalaga o le Silamanino i le vaiaso talu ai, maeu se tamaitai ina a onomea i le faatinoga o ana vaega i le ata, aemaise ai o se uluai taimi lea mo nisi foi o le atunuu e feiloai ma silasila tonu i le tamaitai sa iloga foi lona tulai mai i le tofi o le tausala a le atunuu.
E lima ni vaega o le ata ua mae‘a ona faatulagaina, ma ua mae‘a nei ona faalauiloa le vaega muamua o le ata. Pei la ona muai ta‘ua, o le aso 23 o le masina nei o Me na faia ai le sauniga mo le tatalaina o le ata i le aai i Aukilani, e pei ona faia i le nofoaga o le Dream Centre i Manukau.
Ona see lea i le laumua i Ueligitone, mo le aso 30 o le masina nei lava, ae taualuga i Samoa i le aso 4 o Iuni, ma ua faatulagaina foi, o se isi lea sauniga tāua i totonu o le polokalame o le Iupeli o Samoa.
O ai le Tusitala, na tusia le tala o le ata? (Writer)
O ai na tuufaatasia faamatalaga ma vaaiga eseese? (Producer)
O ai na faatonutonuina? (Director)
Na faamaonia mai e le tamaitai Faatonu o le kamupani a le ETV Production, le faletua ia Eliza Su‘a-Hunt, o le ata tifaga o le Silamanino, e na o le toatasi lava le na faataunuuina vaega e tolu e pei ona fesiligia ai. O le faletua lava ia Eliza, o ia na tusia le tala atoa o le ata, ma o le Tusitala foi lea.
O ia lava foi na taaofaia ma tuufaatasia faamatalaga uma ma vaaiga, atoa ai foi ma le faatonutonuina o vaega taitasi, ma ioeina lona pasia, ma faia le faaiuga mulimuli, a o lei tamauina mea uma.
Saunoa Eliza, o le isi lea mafuaaga o le vave ma faigofie le tuufaatasia ma le galuega tele, ona e tasi le mafaufau na fafau ma faatonutonu folau i vaega uma.
E le gata ina faigofie, ae o se tasi vaega anoa ma le tāua, o le maua tonu ai o uiga loloto ma faatatau tonu e fuafua i tala, faamatalaga ma ata.
O le isi foi lea vaega tāua i ituaiga galuega faapei, o le fausia ma le liliuina o tala tusia, i ata ma ona faatinoga i vaaiga eseese.
O le a le umi na tusia ai le tala o le ata?
Ae faapefea lona pueina ma lona tuufaatasiaina?
Na saunoa foi Eliza i le feiloaiga ma le Samoa Times, a silasila ma manatu i le pueina o ata tifaga, e le o se taimi puupuu e faatino ai.
Peitai o le Silamanino, e tasi le masina na tau aoao ai manogi o le lolo i lona tusiaina.
E lima vaiaso na faagasolo ai le pueina o vaaiga eseese (filming), ae fitu vaiaso na toe silasila i ai ma faia faasa‘oga ma le faatonutonuina (editing).
Ae pei ona sa ia faailoa muamua, ona o ia lava sa faataunuuina vaega uma e tatau mo le tuufaatasia o le ata, sa le gata ina faigofie ai le galuega, ae na faapuupuuina ai ma le taimi faaaluina.
E tasi le itula ma le fasefuluvalu minute le umi o le vaaiga e tasi, o vaaiga e lima o le nei ata.
O a‘oa‘oga aogā ma le tāua o loo i totonu o le ata
Na faamatalaina e le faletua e faapea, E iai vaega loloto ma le tāua o loo afifi i vaaiga ma vaega o loo taulai i ai le ata. O le loloto o Samoa ma lona faasinomaga i totonu o aiga.
O measina a le atunuu, sa tuutaliga mai e mātua, ma e ao ina faaauau pea lea faiga tāua mo le lumanai manuia o alo ma fanau ma ona tagata.
E le gata i lea, ae o le alofa o le Samoa e le faatuaoia.
E moni e iai faafitauli ma faigata o le aiga, peitai, o le taimi o faalavelave ma mea e fai, e vaai lava lea alofa ma le agaga felagolagomai e faia ai mea uma.
O nisi ia o uiga tāua na faavaeina, ma o loo fai ma fu‘a laualuga i le sini autu o le ata ua faaigoaina, Silamanino.
O fea na pueina ai vaega taitasi o le ata?
O le maota o le afioga ia Mataafa Lui Iosefo i lona afioaga i Amaile i Aleipata sa pueina ai se tasi o vaaiga tāua. O le maota e faaigoaina pea, o le Fale Tele. O le Aualuma foi lava a le afioaga i Amaile o loo latou faatinoina le vaaiga lava sa pueina i le Fale Tele.
Ae na ta‘ua e Eliza, o isi vaega uma ma vaaiga o le ata, sa pueina lava i le nofoaga faapitoa, sa fausia faapitoa lava foi mo le pueina o le ata tifaga.
O le nofoaga sa fausia ai o le fanua o lona aiga i Vaitele, ona o le faamoemoe ina ia vave ma leai se faafitauli e feteenai ma fuafuaga a aiga ma nuu taitasi, faapei o nisi ata, o itu ia sa vaavaai mamao i ai.
O le isi foi lea itu sa fesoasoani tele i le taimi sa faatulagaina mo le pueina, ma le tuufaatasia o le ata. O tulaga manuia ma le lelei o le tau i le atunuu, o le isi foi lea fesoasoani tele i le galuega ma le aufaigaluega i le faasaoina o le taimi.
Nisi o tagata taitoatasi ma faalapotopotoga, ma nuu o loo faatino vaega ma vaaiga taitasi o le Silamanino:
O le tamaitai o Verona Parker (Silamanino), Teo Eteuati Magele Sagala (tuaa o Silamanino) Leaula Amosa Tavita (tuua o le nuu), Mailo Ben Vai, (toalua o Silamanino – Fogavai Ki), Rev Ioapo Ioapo FS Ekalesia Metotisi Mulifanua, Faleula (aumalaga), Aulakapi Vailoa Faleata (aumoega), aulotu Aso Fitu o le toe Afio Mai Tiapapata (aulotu ma le Falesa), Aualuma Amaile (aualuma).
O le ata o loo faaaogāina ai le gagana Samoa, pe ua faasamoaina foi peitai ua mae‘a foi ona faaliliuina i le gagana Peretania mo nisi tagatanuu e maimoaina ai (subtitles).
O le a avanoa foi le maimoa a le atunuu i lenei taumafaiga a le ETV Production, i luga o DVD, ma ata video e pei ona faamaonia mai e Eliza Su‘a-Hunt, o le Faatonu o le kamupani pue ata, faapea le ata o le Simanaino. O le ata tifaga muamua lenei a le kamupani a le ETV Production, talu ona amata mai lana auauanaga i le tuufaatasia o ata ma maimoaga eseese i luga o video ma DVDs.
