O le malaga taamilo a le Samoa A a o faagasolo ai le taaloga i Act, Qld ma NSW ua a‘e ai se finagalo i tamalii ma failauga faapea le mamalu o le Asosi a le QRUSA, se‘i faatali aloaia le taunuu mai a nai alo saili malo o si o tatou atunuu (Samoa A-IRB Pacific Cup 2011 Aust/NZ/Fiji).
Ua ova ma le sefulu ma ona tupu tausaga o faavae mai lea Asosi poo le Queensland Rugby Union Samoan Association i totonu o Kuiniselani. Sa tele tamalii ma failauga sa amataina mai foi i le uluai taimi, aemaise le tele o le tautua i nisi o taimi e malaga mai ai le Manu Samoa i Kuiniselani i le tele o tausaga.
O le tolu ai lenei o tausaga o le paeaiga o tulai mai i le taimi nei ma o nisi nei o le komiti a le QRUSA: Faatamā-Susuga Andrew Schmidt; Peresitene-Vaganā Pi Vaganā; Sui Peresitene Lalau John Vaalotu; Failatusi-Auvaa Kosema Maseesee; Teutupe-Flick Bennett; Rugby Manager-Faalafi Pa Enari.
Komiti: Malavai Sinapati; Vaaaoao Lofipo; Christine Leala; Lester Tapelu; Robert Niko.
O le afiafi o le Aso Sa na to‘ai taunuu mai ai i le malaevaalele o Coolangatta i Gold Coast le ‘au, ma faamautu ai i le Runaway Bay Sports Centre i Gold Coast. Na tālia e nisi o si o tatou atunuu aemaise le asosi a le QRUSA le taunuu mai i lea po. O le Aso Gafua ma le Aso Lua o le a tele lava ina fai toleniga ma faatapena atu ai mo le osofaiga i le po o le Aso Lulu.
O le 7 i le afiafi o le Aso Lulu o le a taunuu ai le au i Ballymore Stadium ma sauni loa i le la taaloga ma le QAS REDS ACADEMY.
O le ‘au laiti lea a le RED e tele foi nai alo Samoa o loo taaalo ai. O le mae‘a ai la o lea taaloga tele o le agai atu ai loa e feiloai ma le tele o le atunuu i se sauniga lotu tuufaatasi ma faia ai se taumafataga tele e tapenaina lava e le Asosi a le QRUSA.
O le avanoa lelei foi lea i lea po, o le a feiloai atu ai le ‘au i nisi o kalapu, faalapotopotoga faapea aiga ma uo. O le uluai taaloga ma le BRUMBY RUNNERS i le Canberra Stadium.
Tagai i le itulau 28, mo le lisi atoa o le ‘au a le Samoa-A e pei ona malaga ai i ana taaloga i Ausetalia
