‘Tumau Samoa i le lisi o atunuu aupito matitiva o le lalolagi, o loo maaleale pea lona tamaaoaiga ona o faalavelave faanatura’
O loo ua tāia nei e le Malo o Samoa se faaiuga a le Faalapotopotoga o Malo Aufaatasi pe talia le talosaga ua tuu atu, ina ia tumau Samoa i le lisi o atunuu aupito laititi le tamaoaiga e pei ona sa iai se fuafuaga e see ese ai lo tatou atunuu.
Ua silia i le lima tausaga o laga pea le finagalo o Malo Aufaatasi ua tatau lava ia Samoa ona see ese ma le tulaga lea e iai lona igoa i le lisi o atunuu aupito matitiva pe aupito laititi tamaoaiga i le Lalolagi.
O Samoa ma le Atu Solomona o atunuu ia e lua o le itulagi o le Pasefika o loo iai i lalo o lea lisi a Malo Aufaatasi.
O le finauga ua tuu atu pea e Samoa, poo le ā lava le tulaga lelei e ono mātau mai e malo tetele mai fafo ua ausia e Samoa i le faatautaiga o lona faigamalo aemaise le finauina o le tumau i se tulaga saogalemu o lona tamaoaiga, e lē mafai ona aveesea ai le itu lenei, o Samoa e maaleale tele lona tulaga.
E pei ona saunoa ai i taimi ua mavae le Alii Palemia, Susuga Tuilaepa Lupesoliai Sailele Malielegaoi, poo le ā lava le malosi o sea tulaga, e tasi lava le faalavelave faanatura ae toe foi lava Samoa i faaletonu o atumotu e lē tagolima.
O afā fulifao o Ofa ma Valelia na faaaogā e Samoa e finauina ai se manatu foi faapea na laga i tausaga ua mavae.
E pei lava la ona saunoa le ta‘ita‘i o le Malo, o le afaina ai o Samoa i ia faalavelave faanatura na matua iloga ai lava ona mafatia lona tamaoaiga ma e silia i le 10 tausaga o taumafai le Malo e faafoi Samoa i se tulaga maualuga ma le saogalemu i le itu tau i le tamaoaiga i le mae‘a ai o ia faalavelave tetele.
E lei fesoasoani foi i ai le tulaga faigata na iai le lega sa matuā faatama‘ia uma ai le oloa faatau atu i fafo a Samoa i lea vaitaimi, le talo.
O le lima tausaga talu ai na toe laga ai loa e Malo Aufaatasi le itu lava lea, ua tatau ia Samoa ona see ese mai le lisi o atumotu aupito matitiva o le lalolagi.
O le mae‘a o asiasiga na faia mai ina ua mae‘a Ofa ma Valelia ma ua toe fotuai le matai‘ai o le atunuu, le talo, na manatu ai loa Malo Aufaatasi, ua toe malosi mai le tamaoaiga o Samoa ma na avea lea tamaoaiga ma faataitaiga maualuga a le Faletupe o le Lalolagi faapea le Faletupe o Atina‘e a Asia, “e tatau i isi atunuu uma o le itulagi o le Pasefika ona vaavaai i ai ma lima taitaina ai le faaletonu o o latou tamaoaiga i le vaitau o le 1990,” e pei ona lomia i lipoti o Faletupe o le Lalolagi i ia vaitaimi.
Sa tumau pea le finau a Samoa ona o le popolega e pei ona sa saunoa i ai le alii Palemia o le atunuu, e see ese loa Samoa ae tulai mai ni faalavelave faanatura tetele ona iloa loa lea e Samoa le faigata tele o le taumafai lava o lona malo ma lona faitau aofai laititi e toe faaleleia meatotino e faaleagaina.
O le sunami la o le tausaga na tea nei e ui ina e lei aafia uma ai le atunuu ae ua na o se vaega, na faaalia e le Malo sa matuā aafia ai lava le tamaoaiga o Samoa ma o loo faaauau lava ona toe fausia nofoaga faaleagaina, toe fausia soifua o tagata ua aafia aemaise o le toe tau atia‘e ai o le atunuu, taofia ai ma nisi o fuafuaga i le faalautele ai o atina‘e o Samoa ae sagai ane e toe faaleleia atoa itu o le atunuu ua faaleagaina.
O le fesoasoani tele mai i atunuu i fafo i lalo o le tulaga lea o Samoa o se atunuu ua tauatia‘e, lea ua mafai ai ona vaaia le vave ona tino mai o le toe faaleleia o le atunuu.
Na talanoaina foi e taitai o ofisa o le va i fafo o Samoa ma le matagaluega o fefaatauaiga ma leipa aafiaga nei ona o le sunami i le tausaga ua tuanai, ma ua malilie ai foi e pei ona fautuaina ai le Malo e tatau ona toe talosagaina se isi vaitaimi e toe fausia atoatoa ai le atunuu ma ia toe faaleleia meatotino na faaleagaina mai le sunami ona toe lotea loa lea o le o ese o Samoa mai le lisi o atunuu tauatia‘e ma le lē tagolima.
O lea la ua tālia nei lea talosaga ona o lea ua mae‘a foi le isi lima tausaga na aumai e Malo Aufaatasi e toe faia ai se filifiliga a Samoa po ua tatau le o ese mai i le lisi lea pe leai foi.
