Faatali se fesoasoani mo aiga ma pisinisi na afatia

Asiasiga Palemia
Asiasiga Palemia

Ua alu nei le lua vaiaso talu ona mavae le afā o Gita ae oloo nofo tatali pea le atunuu atoa aemaise pisinisi ma aiga na afaina laoa ma maota i lologa poo le a se fesoasoani ole a maua mai le Malo mo le faaleleia o meatotino na aafia.

Oloo tatali pea poo le a faia se fesoasoani ale faaputugatupe ole lumanai manuia o tagata le NPF e pei ona sa faia foi ile tuanai ole afā o Evani ile 2012.

O pisinisi oloo totogi inisiua o a latou meatotino oloo faatali i suesuega a pisinisi inisiua ona iloa lea pe fia ni tupe ole a latou maua, ae ole Koluse Mumu a Samoa o lea ua sasaa atu iai nisi o foai tupe e faia ai a latou galuega fesoasoani.

Ole koluse mumu a Saina e limasefulu afe tala Amerika le latou foai ile koluse mumu a Samoa. E faapena foi le koluse mumu a Niusila e sefulu afe tala Niusila ma le faletupe ole Pasefika.

Ole Amapasa o Saina i Samoa le susuga Wang Xufeng na ave lana foai mo le afioaga o Faleasiu e selau tagata araisa laiti, ma le tele o isi fesoasoani o taumafa e pei o taga suka ma pusa apa i’a.

Ole Aso Toonai ua mavae atu nei na afea ai Falesiu i lea fesoasoani ma ole tala ale Amapasa i lana saunoaga o Faleasiu o se tasi o nuu oloo vava lalata le la faiga uo ma ole mafuaaga lea ole fesoasoani.

Ua faaleagaina faatoaga ale nuu ae ole foai ale alii Amapasa ma lona faletua faapea le ofisa o Saina i Samoa ole a maua ai e aiga se laveai mo lenei taimi ae o toe faatalitali le toe ola lelei o laau tau faatoaga na afaina ile malolosi o matagi ole afā o Gita.

E lei maua se tala mai paaga a Samoa e pei o Niusila ma Ausetalia poo le a se la fesoasoani, ae ole manu’a mitimiti ole atunuu ole isi mafuaaga lea ole tuai maua o se faamatalaga mai le Malo pe iai ni fesoasoani e maua.

Ole faletupe ole Pasefika le Bank of the South Pacific poo le BSP ua ia faia se faamama avega mo ana paaga oloo faia nonogatupe ile faletupe ole taofia lea ole totogiina o nonogatupe mo le 3 masina.

Faaalia e le Pule ole faletupe ole afā o Evani sa ave fesoasoani tupe ia latou paaga ae ole afā o Gita ua ave masina e tolu e malolo ai le totogiina o aitalafu ae ave seleni e faaleleia ai meatotino a aiga ma pisinisi na faaleagaina ile afa.