O loo faatali nei le faalapotopotoga o le Toomaga mo e Puapuagatia i le Faalapotopotoga o Fanua ma Eleele i Samoa aua se fanua mo se fale e sulufai iai tagata ua moomia le fesoasoani i Samoa.
O se talosaga ua tuu atu i le Faalapotopotoga o Eleele a le malo ona o le o ese ai o le Toomaga mo e Puapuagatia mai i le nofoaga na faapea ona tauaao iai e le Ekalesia Katoliko i Samoa lea o loo i Moamoa.
Faaalia e le susuga Viliamu Paese o le sui sooupu o le Faalapotopotoga a le Toomaga mo e Puapuagatia.
O le tauaao atu e le Ekalesia Katoliko o lenei fanua ma le maota i Moamoa, na talia fiafia e le Toomaga ona o le maualuga o le manaoga mo se nofoaga e faamautu iai fanau ua sauaina ma o loo i lalo o le vaavaaiga a lea faalapotopotoga i Samoa.
O le faafitauli ua faatumulia isi maota o le Malo ua tuu atu mo lenei polokalame fesoasoani ma ua matua moomia se isi nofoaga fou.
Na tali mai le Ekalesia Katoliko i lona maota lea ma faapea ai loa ona teu e tagata teufanua a le Malo lenei nofoaga.
O le faamatalaga a le susuga Paese o le mae’a o le galuega o le toe faaleleia o le maota aemaise o le teuina o le fanua o loo siomia ai na oo atu ai le Ofisa o le Faamasinoga e vaavaai pe talafeagai lea nofoaga mo fanau o loo sulufai atu ma o loo vaaia e le Toomaga mo e Puapuagatia.
O le faaiuga o lea asiasiga na ta’ua e Paese na le talia ai e le Faamasinoga le tuu o tamaiti ma teineiti i lea nofoaga.
Ta’ua e Pa’ese o le manatu o le asiasiga e le saogalemu lea nofoaga e tuu ai fanau laiti ma aveese ai loa fanau nei ma toe tuu atu i nisi o nofoaga o loo mautinoa ai lo latou saogalemu.
Faaalia e Paese na mafua ona tetee le Faamasinoga i lea fale ona e oo atu le asiasiga o loo iai ma nisi tagata o loo nonofo ai i lea nofoaga.
O le toatele o nei tagata o i latou ia ua vaaia i le taulaga o Apia ua feoai solo ua leai ni aiga e faamautu ai.
O le faamatalaga a le faletua ia Maria Rosa o loo vaaia lea nofoaga ua leva lava ona le o toe iai ia tagata mai i eleele nei ona e matua tapu lava le tagofia o le ava malosi i nei maota ma o le toatele la e feoai solo lava e ala ona fia nonofo ai i lea maota ona o le manaoga lea e inu ai le ava.
O tapu nei na amata ai loa ona taape ia tagata e oo mai i le taimi nei.
E ui i lea na faaalia e Paese o loo malosi le manatu o le Faamasinoga aemaise foi o le Toomaga mo e Puapuagatia e le saogalemu ia nofoaga mo le fanau laiti.
O le faamoemoe la ina ia vave ona maua atu se tali a le Faalapotopotoga o Fanua ma Eleele a le Malo ina ia fausia ai se nofoaga tumau mo i latou ua sulufai atu i le Toomaga mo se fesoasoani.
