Faatali se faasalaga mo Mulitalo Siafausa

“Ua faamaonia ona moliaga o le faia o gaioiga matagā i se tamaitai sa ia faafaigaluega”


O le aso 16 o le masina fou o Aukuso o le a aumai ai se faasalaga a le faamasinoga i moliaga e sefulu o le faia o ni gaioiga matagā ua faamaonia faasaga i se tasi o tamalii sa avea ma faipule ma minisita o le kapeneta, ae o loo galue nei o se tasi o Komesina o le Komisi e Pulea Tagata faigaluega a le Malo le PSC, le tofa Mulitalo Siafausa Vui.

O moliaga nei na faia e leoleo ona o se tagi a se tamaitai sa faafaigaluega e Mulitalo i lona aiga i Vaimoso-uta. O galuega sa faatonu e fai o le fafaga o moa ma fu‘e fuamoa ma isi lava galuega i le fale ma fafo.

O tolaulauga a leoleo i le mea na tupu na faaalia ai o le tamaitai e 32 tausaga le matua sa saili galuega i se tasi e masani ai mo le tausiga o lana fanau e toatolu.

Ina ua mae‘a lana galuega sa ia faamatala i leoleo e faapea o le aso muamua na usu ai lea sa feiloai ai ma Mulitalo. Sa fesiligia o ia i le taeao lea e lē ua molia pe fai sona toalua ma sana fanau ma sa ioe i ai.

Na faamatala foi le tamaitai i leoleo sa fesili atu lē ua molia pe alofa ia te ia. Sa tali i ai ioe ona e alofa i lē ua molia ona e pei o se tamā ia te ia. Sa faamatala foi le tamaitai i leoleo e faapea sa faailoa atu e Mulitalo ia te ia, ia aua lava ne‘i ulufale atu se isi i totonu o le fanua i faitotoa o le fanua. Ina ua mae‘a lea tulaga sa agai loa le tamaitai i le nofoaga o iai le lafumoa, ae peitai a o savali agai i le tasi o itu o le fale sa valaau atu lē ua molia e avatu lona solo taele. Na agai atu le tamaitai ma le solo taele ma ia vaaia o loo matala le faitotoa o le faletaele.

Sa faapea atu “o lou solo lea” peitai na faamatala le tamaitai i leoleo o le taimi lea na aapa atu lē ua molia ma uu lona auvae ma unai atu ma taumafai e sogi (kisi) ia te ia. Sa ia tulei ese lē ua molia ma sa lagona lona fefe ma le matamuli. E ui ina sa tupu lea tulaga ae sa naunau pea e faigaluega ona o le manaomia o se tupe mo le tausiga o lona aiga.

Faaalia e le faamasinoga i lana iloiloga, o le fesili i le alofa ma le manao o lē ua molia e avatu lona solo taele o ni aga e mafai ona faamatalaina o ni aga e lē talafeagai mo se tasi o loo faafaigaluegaina se tagata.

O le aso na sosoo ai na toe usu ai le tamaitai i lana galuega. Na ia tau atu i lē ua molia o loo taoto mai i luga o se moega i le potu malolo. Sa faapea atu lē ua molia ia te ia e alu atu e nofo i ona tafatafa ma o le avanoa lea na fai atu ai ma lē ua molia e tago atu (ua lē faailoa ona o le matagā).

Sa faamatala e le tamaitai sa ia lagona lona maasiasi ma le fefe ae sa ia faia pea le faatonuga e tago i ai ona o le manao i se tupe.

O nei gaioiga uma sa matuā teena e lē ua molia lona faia o se gaioiga e lē talafeagai (denied act of misconduct). O aso e fā na sosoo ai o le mea lava lea na tupu e pei ona faaalia i taualumaga o le faamasinoga ma le fofogaina o molimau a le itu a leoleo.

E 20 le aofaiga o moliaga sa molia ai Mulitalo. E sefulu moliaga o le faia o ni gaioiga matagā ma le sefulu moliaga o le taumafai e faia ni gaioiga e faaosofia ai ni lagona e faatino ni feusuaiga.

Peitai o moliaga ia e sefulu e lei faamalieina le faamasinoga i mau a leoleo na tuuina atu e lagolago ai, ma faapea ai ona soloia ma faaleaogaina. Ua poloaina lē ua molia e taofia ona pepa malaga ma lona tusifolau ae o le aso 16 o le masina fou o Aukuso e lauina ai se faasalaga.